曼聯今期夠紅，舊將堅尼一樣紅，我求大俠都未趕得切恭喜佢成為上月英冠最佳領隊，前日就見佢帶領「黑貓」新特蘭作客砌低西布朗，爭升班形勢唔錯。會方表明一旦升班，即刻畀2,500萬鎊（約3.8億港元）堅尼招兵買馬，睇嚟重見「光明」（新特蘭球場名）之日不遠矣。
升班即獲3.8億擴軍
睇開英國波，都知攞親咩每月最佳球員、最佳領隊，隊波多數無運行，殊不知堅尼不但無中呢個「魔咒」，前日贏西布朗，終止對方8場不敗後更成功保住第4。講番轉頭，黑貓季初曾經4連敗衰到貼，後嚟堅尼上任，搵番曼聯舊隊友約基幫拖；再加埋約翰、史杜基斯等愈踢愈好。我求大俠之前入咗新特蘭球迷會，成日收到堅尼寫畀球迷嘅電郵，睇佢勝不驕、敗不餒，同以前鋪牛脾氣比，不知成熟幾多。
據講，新特蘭喺班主昆尼嘅財團支持下，唔憂無錢擴軍，如果升班，堅尼會斟蘇斯克查、加維臣呢啲過氣名將。希望呢股東北勢力再入侵英超，咁就更熱鬧啦。