新城財經台擺春茗雄才宴兼舉辦香港企業領袖品牌頒獎禮，席設香格里拉酒店，睇落有成三十圍酒，好多銀行、大商行、車行等等各佔一圍，甚為熱鬧。
左丁山與Ｃ教授同席，互道恭喜發財之後，問一聲：「叫得一聲Ｃ校長未？」Ｃ教授連忙耍手擰頭：「千祈唔好，仲要見唔少人。」以前大學招聘校長，多在幕後招聘，獵頭公司與校董會之「聘任委員會」搵到適合人選之後，向校董會推薦，經校董會拍板，就可以宣佈，但𠵱家時興公開，攻擊「黑箱作業」，請校長如同公開選美，於是一啲比較怕醜嘅人才，就敬而遠之。左丁山敢大膽講一句，Ｃ教授如果一早知道有咁公開嘅程序，或者會事先三思。左丁山一位英文老師Ｔ返美國後，成為知名教授與大學副校長，佢間大學係州立大學，幾年前改制，聘請校長似我哋選舉特首，要公開提名，公開答問。老師Ｔ點都唔肯申請，佢話校董會想邀請一兩位大名氣教授申請，佢哋都唔制，因為啲名教授喜歡人哋禮賢下士，三顧草廬然後先至出山，好唔鍾意寫下「政綱」，「競選」校長職位。
Ｃ教授話目前不可多言，唔講嘢就聽嘢啦，獅子行大經濟策略師Ｇ俾電台「屈」咗上台做五分鐘「經濟棟篤笑」，甚為精彩。獅子Ｇ係經濟分析界著名冷面笑匠，講黑色笑話可以做到人笑佢面黑。獅子Ｇ話，風水師乜都講得，將風水學引伸到經濟、股市、公司大運，無所不能，佢都想讀番一個風水學學位，然後暢所欲言。例如有人問點解獅子股價跌，佢講一大堆經濟分析理由會俾人批評為講咗等於冇講。但係呢，如果佢又講埋風水理論，話從獅子大樓外望，唔見咗天星碼頭，即係話獅子冇咗個碼頭入水落水，故此運氣轉差，股價下跌，咁又人人點頭，話獅子Ｇ講得有道理喎！難怪獅子Ｇ話要學風水，風水師就可以放言高論啦。大家聽到嘻哈大笑，覺得學經濟不如學風水，想深一層，獅子亞太區大班鄭當年曾與示威盲人喺天星碼頭前瞓街，幾個月前佢哋如有風水師指點，成班獅子高層到碼頭瞓街保護天星，股價可能冇咁弱呢！