落筆前諗足半個鐘，應如何給這間食店分類，單看舖面，它是間Cafe，再看其午市菜牌，吃的全是大路價平的茶餐，再瞄一瞄夜市Menu，竟全是日式串燒，1間餐廳3種「士戴佬」，是老闆太貪心之過？非也！其實他只是想在日與夜兩個不同時段，推出不同類型的菜式和選擇，可滿足白天在附近返工的白領；晚市又可讓附近街坊有個飲飽食醉的好地方，果然諗得周到。
文：甘露露 攝影：伍慶泉
Model：Cat
餐廳玩變身多選擇
實不相瞞，我一向鍾意踎茶餐廳，貪價錢經濟，款式夠多，雖然環境嘈少少，污糟少少，但我亦樂於坐在那裏食個快飯。閒談間同老闆Gary講起我這個飲食習慣，佢第一句就話：「茶餐廳呢類格局𠵱家唔興㗎啦，呢個亦係我開呢間餐廳的原因之一，呢度附近日頭有好多寫字樓客，所以我上晝以平價午餐做主打，以西餐為主，亦有撈檬粉、春卷、香茅豬扒、咖喱、和風拉麵等越泰日美食，但一到夜晚7點，成間舖就會轉為日式居酒屋，以純日燒做主打，嫌食串燒唔飽，可以揀套餐跟飯或麵，$48起，全部即叫即燒。」串燒送飯都俾你諗到，服你咯，但都好，食量大如我者，若然無粒飯落肚，都唔知要隊幾多串先夠飽！
醬汁最講究
初看格局還以為出品與一般Cafe大同小異，殊不知原來坐鎮廚房的大廚Eddie有18年入廚經驗，對泰式和日式醬汁的配搭特別有研究，最拿手的除自創的日式燒蠔汁外，還有泰式金不換辣汁，用魚露、青檸、蒜茸、辣椒及金不換等製成，用來配海鮮最夾。
除醬汁出色外，Eddie對海鮮同樣講究，為確保每日有新鮮海鮮，他每朝5點就到附近街市取貨，「每日我會攞龍蝦仔、扇貝、鮑魚仔，再視乎當日有咩靚料，日本岩蠔就有相熟供應商供貨，唔鍾意食招牌焗蠔，仲有金不換香茅焗蠔。」我一坐低見侍應即放低兩碟醬汁，我有好似大鄉里出城咁問大廚係乜嚟，「係用嚟食串燒，一碟係泰式金不換汁配海鮮，另一碟係日式醬油配肉類最啱。連串燒都有汁另跟，果然係非一般串燒咁簡單。
1.扇貝底面輪流加上日式燒雞汁燒香，可避免肉質變老，肉離殼即上枱。$16-$20/隻
2.白鱔是眾多海鮮中味道最鮮的一種，魚皮油份充足，起骨燒香後皮脆肉滑。$18/串
3.1串1隻，起肉切片後灑上海鹽、胡椒輕輕一燒，螺肉入口爽脆有咬口。$14/串
鹽燒龍蝦仔$55-$60/隻
龍蝦太大隻燒會「嚡」，所以只用8至10両重的龍蝦仔。鹽燒可食到蝦的鮮味，喜歡濃味的可選擇較西式的開邊芝士焗。
招牌岩蠔$30/2隻（上）
這裏的岩蠔比其他餐廳平一半，最特別的是淋在蠔上的濃汁，以白麵豉、蛋黃、植物油及橄欖油用人手打足半日，製法繁複，帶甜味的醬汁與鮮蠔味非常夾，味道分明。
金不換辣椒膏焗蠔$30/2隻（下）
Eddie用上金不換辣椒膏來焗蠔，還特別加入青檸汁和金不換葉來中和辣椒膏的辣味，酸甜辣味共冶一蠔。
新鮮鮑魚仔$18-$20/隻
鮑魚仔要燒得肉嫩鮮甜，最佳做法是燒至8成熟，一邊燒一邊掃上日式燒雞汁，雞汁可帶出鮑魚的鮮味。
安格斯牛小排$20/串
論肉質及味道，加拿大安格斯牛扒與美國的差不多，加上選用近牛仔骨部位，油分布平均，以猛火輕輕一燒，先鎖住肉汁，再灑少少黑椒粉調味，肉質腍滑，味帶酥香。
睇路搵食
銀川餐廳（25597060）
地址：西營盤威利麻街23號威利大廈地下E舖
營業時間：星期一至六7:30am至6pm、7pm至1am（星期日休息）
座位：32個
