林子祥（阿Lam）同泳兒兩位英皇旗下歌手，前晚喺會展為英皇金融集團嘅春茗聯歡晚宴擔任表演嘉賓，一人唱三首歌，老闆楊受成同埋仔女楊其龍、楊黛思夫婦同個女都有出席。
阿Lam同泳兒邊唱邊落台握手，阿Lam更大受歡迎，有小朋友攬住佢唔放，男人捉住佢合照，仲有好多女人見佢如見蜜糖，唔理阿Lam專心唱緊歌，硬要企埋佢旁邊影相，有個女人黐埋去幾乎錫到佢嘅面咁滯，搞到阿Lam有啲唔耐煩，唱完就拿拿臨走人。其實阿Lam出席私人晚宴唱三首歌，最少收十幾萬酬勞，咁好搵，應該開心啲先係啦！
春節狂賺想買樓
泳兒作為新人，當然識做好多，仲特登搵老闆楊受成握手，又主動攬經理人霍汶希。泳兒事後話今年收到50封利是，又狂接春茗騷，全部酬勞總計都有六位數字，佢話𠵱家好想買樓，希望儲兩、三年錢可以畀首期買到間過千呎大屋，尤其想由九龍區搬去香港區住喎。
講到元宵節，泳兒話冇拖拍又冇人陪，父母撇甩佢去睇戲，細佬又出咗街，問佢係咪想出年有人陪，泳兒話：「順其自然啦，遇到個鍾意嘅都無妨。」
