混能車的確夠晒環保，不過價錢貴成截唔係人人接受得到，好在環保車稅務優惠最近公布，車價唔再貴到離譜。新款Lexus混能車GS450h啱啱到埗，房車格調帶跑車味道，馬力夠勁燃料低消耗，廢氣少空氣質素提高，出新車先平5萬，再幫你慳3成油錢，慳錢得嚟亦夠晒環保！
記者：周達之
攝影：陳盛臣
模特兒：WinnieLam
首次登記稅先慳一筆
4月1日開始，對環保車的稅務寬減措施將正式生效，加上油價越嚟越貴，各準車主係時候要將目標放喺混能車身上。而LexusGS450h就係近排至矚目嘅豪華房跑車，據引入呢部車嘅富利堡汽車所講，GS450h已肯定攞到環保私家車證明書，即係話買家出車可以先慳成5萬元嘅首次登記稅！
不過話時話，呢個世界真係唔公平，有錢買得起Lexus豪華級混能房跑車GS450h的人，居然可以慳油錢之餘仲可以享受埋環保稅務優惠，果真富者越富，而小記呢個錢七車主繼續日日捱貴油，搞到貧者越貧。查實呢個世界最環保嘅係唔揸車嗰班人，不如叫財爺改為向唔揸車嘅人每人派5萬，無車牌派10萬，係咁嘅話小記即刻賣車兼唔續人牌！
操作與普通車無異
GS450h簡單啲講就係叉燒飯加隻蛋，即係「GS350」+「擁有200匹輸出的交流電馬達」，GS450h的外形及設備都同舊款GS350一模一樣，只係GS450h除咗有一台GS350用開的296匹3.5升V6引擎外，再加多一副可輸出200匹馬力的交流電馬達，令總馬力輸出達345匹，數值直逼4.5公升引擎。或者你會問：「乜296匹加200匹唔係496匹咩？」Sorry，小記唔係大偈，所以唔識計，總之官方資料就係寫住345匹。
GS450h在起步時會以電力起動，所以非常寧靜，鍾意懶係勁轟轟聲撻車的可能會失望，而起動之後再加速時，引擎將會介入以增強動力輸出，並跟電馬達相互交替工作。到落斜或作出制動時，GS450h又會識得自動幫電池充電。以呢種方式運作，除能減低廢氣及更加寧靜之餘，亦能做出14.2km/L的極低平均耗油量。而根據EPA測試，GS450h較同級搭載V8引擎的對手慳成28%油！
不過其實講咁多原理都無謂，因為查實所有事情都有電腦幫你控制，其餘所有操控都同揸部自動波車完全無分別，唔使擔心應付唔嚟。
夠細心先至係豪華
改用混能系統之後，GS450h比傳統只用汽油作燃料的GS350，行車時來得更寧靜舒適，再加上底盤優異隔音與吸震效果、軟硬適中的懸掛，不震不晃，一貫高級房車享受。至於馬力就更加唔使多講，扭力夠、輕踏油門又能暢快推進，Brake又應，呢啲咪就係所謂嘅收放自如囉！
內櫳方面，話明係豪華房車，內裝當然要靚得嚟細心，單係真皮座椅已經有防靜電、除臭、暖氣同位置記憶功能；用嘅音響係MarkLevison，而中控台上更有一個7吋屏幕，平時用嚟顯示導航畫面或行車狀態，仲可以幫你計埋油錢，而入後波時又會自動轉到泊車模式顯示車尾狀態。安全氣袋大大個用嚟保你閤家平安，而車門內側仲設有紅色LED燈，開門即着，用嚟喺夜晚提示其他司機之用，諗到咁周到，呢啲咪就係所謂嘅細心囉！
抵讚：
慳油又環保，減少使用引擎令行走時更寧靜安定，設備亦見豪華。
要彈：
多咗個電池同馬達，車身重咗，而且一部車越複雜就越多壞車機會，用家預咗要入多咗廠。
LexusGS450h
引擎：3,456c.c.V6DOHC
馬力：296ps/6,400rpm
扭力：37.5kgm/4,800rpm
交流電馬達：馬力：200ps/扭力：28.0kgm
傳動：CVT無段變速自動波，後輪驅動
尺碼：4,830×1,820×1,425mm
車重：1,890kg
平均耗油：14.2km/L（日本10．15模式）
售價：待定
車輛提供：富利堡汽車（28776700）
