周麗淇（Niki）噚日喺荃灣出席元宵活動，同現場嘅小朋友大玩遊戲，場面熱鬧。早前有報道指周麗淇嘅緋聞男友鄭嘉穎揸車去女方屋企相聚，俾記者發現後速逃，親密關係斷正。
Niki噚日提到呢件事時話：「我前日先喺加拿大返嚟，對於報道冇乜好回應。」之後佢對有關提問都一概唔回應。噚日係元宵佳節，問佢有乜嘢節目，Niki話：「我都係噚日至知今日係元宵，呢啲節日我唔重視，但會返屋企同父母、公公婆婆食飯度過。」
刻意製造曖昧
不過周麗淇之後又煞有介事咁話：「聽聞個月亮好圓，都可能會賞月嘅。」咁馮仁昭梗要問佢會唔會叫鄭嘉穎陪賞月，Niki就只係不停狂笑。問佢係咪默認同對方嘅關係，Niki話：「我唔係默認，只係唔想多講啫。」言下之意即係否認同鄭嘉穎關係囉？佢又答到咿咿哦哦，淨係識話：「我唔回應喇。」馮仁昭覺得佢雖然一味咁話唔回應，採取鴕鳥政策，但都覺得佢一提起男方就表現曖昧，有欲蓋彌彰嘅感覺。至於鄭嘉穎就至截稿前仍未回覆。
