何韻詩前晚於將軍澳擔任表演嘉賓，近來她分別和張繼聰及麥浚龍（Juno）合作，自嘲已淪為老一輩的歌手，和Juno更是牛頭不搭馬嘴，不過就算跟他們有代溝，但因都喜歡音樂，故無阻合作。
由無綫音樂台主辦的《UMC音樂節總決賽》前晚在將軍澳電視廣播城錄影，何韻詩、at17、林一峰及方大同和張繼聰擔任表演嘉賓。現場有13個單位參加比賽競逐冠、亞、季等獎項。
「兩個世界嘅人」
何韻詩跟張繼聰打頭陣表演，首次跟張繼聰合作的她，笑言最近成了老一輩的歌手，她笑說：「以前同前輩合作，而近期就同Juno、張繼聰呢啲小朋友合作。」問阿詩可覺得有代溝時，她說：「張繼聰就大家咁上下年紀，同Juno就有㗎，佢講埋啲𡃁仔嗜好、潮流嘢，自己連掹車邊都掹唔到，開頭都諗住扮潮去搭嘴，但最後都放棄，因為大家係兩個世界嘅人，我今日喺個廠入面算係最大年紀嘅人，估唔到做幾年歌手，一轉眼變成老人家。」
欲學明哥建品牌
前晚的參賽者大都以樂隊組合參賽，阿詩表示自己都有留意他們的表現，她透露希望仿效黃耀明般有自己的音樂品牌，她說：「我希望老時可以有後着，所以𠵱家會不時留意身邊有潛質的音樂人同新人。」
此外，有報道指方大同介入薛凱琪（Fiona）和房祖名的戀情做第三者，方大同對此表示：「自己冇睇新聞，都係啲朋友睇完攞嚟笑我，係啲雜誌搵嘢嚟寫，我就冇為呢件事唔開心，反而知道Fiona有為啲標題唔開心，但我要澄清大家係冇嘢，只係朋友。」
採訪：馬建華
攝影：陳俊強
