90年代黃一山（細龜）憑一張孩子臉在影、視殺出一條另類路徑，今日的細龜，娃娃臉仍在，風光卻不再，幸因周星馳電影經常在內地重播又重播，讓當日跟他合作無間的細龜沾沾光，憑星爺餘威在內地登台接騷，養妻活兒。細龜更揚言：「拍100部爛片都唔夠拍一部周星馳電影犀利。」原來，養大一個小朋友，不一定要儲足400萬，只要拍多幾部星爺電影足夠矣！採訪：戴彩煥
黃一山87年加盟無綫出任綜藝節目編劇，90年代客串演出《笑星救地球》時，因為經常被廖偉雄和胡大為以鐵片製成的「笑星拍板」虐打而聲名大噪，由編劇轉到幕前發展。轉眼20年，現年42歲的細龜雖已步入中年，又是兩子之父，但歲月未有在他臉上留下任何痕迹，令不少經常打羊胎素保青春的女士們既羨慕又妒忌。
觀眾投訴虐兒
於95年結婚的細龜，現時效力廣東電視台，做導演又做演員，由於經常在內地工作，所以他索性與妻兒搬返內地居住。細龜回想當年由幕後轉到幕前發展，多少是受黃一飛慫恿，細龜日前接受訪問時說：「黃一飛話我個樣喺圈中好難搵到，20幾歲人仲10幾歲咁樣，將來一定紅，𠱁到我幾開心。搵童星做嘢好多規限，當年《笑星救地球》想學外國節目《BennyHill》（不文山）玩糟質人，想搵個可憐細路嚟糟質，但又怕俾人告，於是搵咗我做，點知後來真係有觀眾投訴TVB虐兒！」
細龜憑《笑星救地球》走紅後，正式轉到幕前發展，又做電視又拍電影，事業果然如黃一飛所講般順利。不過，令細龜更上一層樓的卻是周星馳，甚至今時今日，細龜仍能借助星爺餘威來搵飯食。
細龜說：「拍100部爛片都唔夠拍一部周星馳電影犀利，91年向太（向華強太太陳嵐）打電話畀黎文卓（TVB前高層）搵我拍《逃學威龍》，錢唔係多，得5、6萬蚊，仲要拍足成個月，但我一聽係周星馳主演，覺得實有料到，結果證明係啱，我拍完《逃學威龍》之後，拍咗《逃學外傳》同《逃學英雄傳》，跟住無端端又接咗幾部戲，有啲爛到片名都唔記得。周星馳嘅電影經常重播，無論香港同內地電視都一樣，因為佢嘅關係，全中國起碼有超過一億人認識我，到𠵱家仲有人搵我登台做騷。」
因朱茵免捱鬧
問細龜眼中的星爺為人怎樣時，他說：「佢好聰明，對自己同拍檔要求好高，要其他人跟住佢嗰種語調、節奏快慢去做，好多人都受唔到。拍到後期，佢壓力越來越大，因為唔可以跌落嚟，一跌落嚟就會一沉百踩，所以好多時佢都會不留情面咁鬧人，不過，佢通常鬧男不鬧女，因為靚女唔捨得鬧，自己所見，俾佢鬧得最甘係李力持。」與星爺合作以來可試過被對方喝罵？細龜一臉蠱惑笑說：「我又冇俾佢鬧過，一路以嚟佢對我都幾好，可能人夾人緣，又或者因為我同朱茵好老友關係（當年周與朱茵傳緋聞），佢唔睇僧面都睇佛面！」
攝影：陳俊強
本欄逢周二刊出
