Wasabi煮菇 酸酸哋唔攻鼻

Wasabi煮菇 酸酸哋唔攻鼻

上兩星期是農曆新年,不停食到肚腩現晒形,脂肪超晒標,是時候要食番清淡啲。若日日要食青菜就太寡喇,不如食菇菌類,好味又有益之餘,煮法亦非常創新,原來用芥辣煮菇,一啲都唔攻鼻,味道酸酸哋,令人胃口大增。弊!啱啱先話食番少啲嘢㖭!

記者:梁學文 
攝影:譚盈傑 
Model:Cat、Hidy

菇菌助回復體質

新正頭係咁食,體重好似新年前恒生指數係咁升,着褲都唔使用皮帶,所以食菇菌類做的菜就最適合,一來唔怕肥,二來又可以回復體質,海景軒大廚梁師傅話:「新年個個食到飽晒,脂肪含量超標,膽固醇又高,對身體唔係幾好,所以我就諗住用菇菌做菜,食得健康啲。而且菇菌類嘅菜有益又好味,好似老人頭菇,味道一流之外,仲可以引出胃口,食滯咗或者食慾不振就最啱。大吃大喝完幾個禮拜,係時候要調理一下。」

雲南菇品質保證

雲南山多,屬於山區地帶,而且濕度高,陰陰涼涼最適合菇菌類的生長,今次菇菌菜用的菇菌,全部來自雲南,梁師傅說:「雲南係菇菌類嘅溫室,地理環境同氣候好適合種植菇菌。雖然菇菌嘅價錢未必可以同歐洲嘅比較,不過就勝在產量豐富,品質亦有保證。」今次的菇菌菜除了有一般常用的茹菌之外,還有一些特別的品種,好似澳洲菇、老人頭菇同黑塊菇等。

●梁師傅話虎掌菇味道最重,煮時要小心火候。

菇菇小檔案

黑塊菌:有助增強食慾,口感似冬菇。

澳洲菇:味道比普通的冬菇深沉,肉質厚,腍中帶爽。

老人頭菌:香味比較重,味道亦夠濃,有助增強體質,對頭髮生長亦有幫助。

虎掌菇:高血壓人士最適合,因為有降血壓功效。

羊肚菌:價錢比較貴,味道濃,最好夾肉類。

奶油菇:菇味唔算重,不過就夠爽口。

1.日式青芥靈芝菇$88

先將靈芝菇炸一炸,再加入Wasabi撈勻,中日合璧,味道好特別。煮過的Wasabi無攻鼻的感覺,反而有一種淡淡的清香,味道酸酸哋,更加引出胃口。靈芝菇味道比較淡,配濃味的Wasabi汁好夾,先是Wasabi的味道,咬多兩啖,淡淡的菇味自然滲出。

2.鮑汁燜原隻澳洲菇$158

澳洲菇似塊扒,其實係特大冬菇,味道比一般的冬菇更重。師傅用豬肉、冬菇、葱同馬蹄等材料,釀入澳洲菇之中,然後再加入蒜頭同蠔油一齊燜。入口有多重口感,用了馬蹄就更爽口。

3.鳳凰老人頭菌$148

用雞蛋包住老人頭菌同碎牛肉一齊蒸,蒸完再煎,工夫雖多,不過口感同味道唔錯。老人頭菌煎過,更加香口。老人頭菌入口菌味好重,帶些少甘苦味。

4.碧玉虎掌羊肚菌$168

白色的是芙蓉,即係蛋白,味道清淡配菌味重的虎掌菌同羊肚菌就最好。虎掌菌味道好重,要花時間燜,入口稍似木耳。羊肚菌貨源少,比較矜貴,味道亦較濃。

5.黑塊菌焗雞$268/全隻

師傅用亁葱同黑塊菌醃雞,醃1個鐘左右就入爐焗,讓雞肉吸收到黑塊菌的味道。食的時候,記得要蘸些雞汁,味道就更上一層。

睇路搵食

海景軒(27312883)
地址:尖沙嘴麼地道70號海景嘉福酒店B2層
座位:100個
營業時間:11:30am-3pm、6pm-11pm