某日行經佛羅倫斯嘅橫街窄巷，發現一部非常得意嘅黃色三個轆私家車；我見到部車嘅第一個感覺，就係諗起喺卡通片《IQ博士》入面，響天神村行走嘅車仔一樣，牌子名應該係Posquali。平時見到三個轆嘅車，通常都係單車，仲要係無蓋嗰隻，但眼見佢咁鬼得意，而且車身細小，真係好適合響當地行走，若果喺香港佢出現，肯定型到爆。搵勻全車都見唔到有油缸位置，估佢係用電啩？內裏只有一個駕駛座位，雖然後座仲有個類似DogSeat嘅位置，但座位太細，用嚟放置雜物都仲可以，坐人喎？對腳都唔知放邊好，唔通要用瑜伽式咁坐！
泊喺意大利街頭嘅車，無論平、貴都好，架架車都黐滿塵；但呢架就唔同，車嘅內、外都非常整潔，玻璃窗都抹得一塵不染，相信車主一係女性、一係就係有潔癖嘅人，唔係小記點會拍到車嘅裏面呀！當小記返到嚟香港，將呢部車相傳畀一眾女性朋友睇時，個個都爭住話要用嚟做電腦Wallpaper，話部車好Cute喎！可惜搵唔到有佢嘅模型車賣，如果唔係買嚟送畀佢哋都好吖！
文、攝：TigerL