娛樂圈貪新忘舊，細龜入行沒幾年已深明此理，90年代他同時為幾個受歡迎節目孭飛，至95年卻淪落到日日坐冷板櫈，細龜說：「95年我簽120個騷，但成年只係做得幾個，除番條數，你話我係咪全台時薪最貴藝員？96年約滿，大家都冇誠意繼續合作，咁啱有線兒童台搵我做兒童節目主持，我咪去有線做，一做就做到03年約滿。嗰陣時都幾慘、幾徬徨，好在咁啱蕭若元又搵我拍劇，一拍拍到04年──自己一生都遇到幾多貴人㗎。」
做成人騷主持
細龜效力有線期間，遇上金融風暴，跌至遍體鱗傷，他在經濟困難時，曾向朋友求助，結果失望而回，令他深深體會「登天難，求人更難」這道理。細龜說：「只要生存到落去已經好好，唔一定要紅。𠵱家我喺廣東電視台工作，對方畀好大自由度我，唔使我敲門送禮，唔使我奉承人，亦唔需要求人，因為一求人就俾人睇低，朋友都冇得做！」問細龜是否不再回港發展時，他連聲否認之餘，更透露未來大計：「香港有個收費電視台，想搵我做成人節目talkshow，唔係樂而不淫，係樂而且淫，自己覺得幾有挑戰性，唔使幾十歲人仲做學生，希望到時可以畀到另一面觀眾睇吓。」