由於日圓套息交易爆發平倉潮，環球股市上周出現大地震，就連美國股市也難倖免，投資者紛紛以經濟疲弱及地緣政治緊張作為沽貨藉口。不過，雖然目前股海風高浪急，但由於美元疲弱，美國股民揸住現金都唔係好化算，所以唔少股民都話冇有怕，繼續買股票。以下就係《華爾街日報》網上版上星期進行的調查：「究竟手頭有閒錢，啲美國人會投資喺邊度？」
黃金債券可成避難所
調查請網友喺股票、債券、房地產、黃金、現金或其他投資工具中，選出𠵱家最好將啲錢放喺邊度，結果發現46%仍會選擇買股票，20%選擇現金，買黃金同債券的則各自有10%。
網友jebpgh認為最好就係分散投資，但佢對上星期環球大股市感到非常意外：「真係估唔到上海股市大跌對全球股市牽連咁大，但我相信中國經濟冇問題，只係個市反應過敏啫，相信美國經濟在未來6至12個月會軟着陸嘅﹗」
wolfematt說：「我都覺得市場反應過敏，跌市反而係低吸優質股嘅好機會。」edvince亦附和：「大市調整好正常，應該繼續買股票。」
不過，chrisknop就有唔同睇法：「美國貿易失衡、美元走弱，股市又波動，我覺得最好嘅投資就係黃金，其次就係債券，因為跌市可能只係短暫調整，亦好可能係熊市嘅開始。」