【本報訊】她們慘被癌病、失婚、喪偶、欠債煎熬，但仍咬緊牙關勇對逆境，終於戰勝了病魔、擺脫了財困、養活了孩子，讓暗淡的生命重見曙光。十名自強不息的婦女，昨獲沙田婦女會頒發「積極人生擁抱朝陽獎」。飽受癌病折磨的得獎者吳太說，「要完成做母親嘅責任」這個信念，支持她熬過貧病交迫的困境。記者：雷子樂
「小學二年級開始，我哋就周圍搬屋，起初我當係學校去旅行咁，覺得好開心，都唔知媽咪出咗咁多事」。19歲的阿Sa昨憶述，直至看到媽媽的秀髮漸漸脫落，才隱隱察覺到大事不妙。「當時太細個啦，都係抱吓、錫吓，生日時畫幅畫咁去鼓勵媽咪」。看着剛考上大學的女兒，今年51歲的吳太露出燦爛笑容。
12年前，吳太患上淋巴癌，多次電療令「以前好靚女」的她元氣大傷，這時候婚姻關係破裂、丈夫生意失敗、債主臨門等打擊接踵而至。養尊處優的婦人，頃刻間要面對重重打擊。「最辛苦係剛有cancer嗰三年，做完化療後有成半年開唔到聲，我怕屋企欠債拖累到家人，帶住個囡囡匿埋咗5年，其間唔敢同屋企人聯絡」。
「要完成做母親嘅責任」
直至兩年前，吳太終於跟丈夫離婚，獨力打工，養活女兒。「我覺得做女人一定要完成為人母親嘅責任，起碼要供個囡囡讀完大學」。吳太說話有點吃力，因她接受電療後出現後遺症，牙骨漸漸鬆脫，現要到昂船洲接受高壓氧治療。但她仍沒有放棄，「我𠵱家就好似初生BB咁，會好珍惜生命每一刻」。
44歲的新移民石小紅也成功克服喪夫之痛。她90年來港，93年丈夫罹患腸癌去世，「嗰時又唔識廣東話，人生路不熟，個人好似個空殼咁」。當時兒子只得1歲半，她在兒子入讀幼稚園後，找到酒樓工作，「份工好辛苦，但係我都捱咗8年」。她失業後參加家務助理培訓課程，現已重投勞動市場，希望靠自己努力養大兒子。