因為出席新城財經台雄才宴，睇唔到電視特首競選答問大賽直播，可惜也，本來呢場係答問大會，唔係辯論大會，以為曾梁二人各自答問題，各說各話，實行悶到觀眾打喊露啦，睇唔睇冇緊要，點知返到屋企之後，睇新聞報道，唉吔，乜好似有對話、對質咁嘅場面嘅？家人話幾好睇噃，梁家傑判輸嚟踢，猛咁進攻，而曾蔭權就知道選舉贏梗，好似打麻雀去到最後兩鋪，一於守和摸黃算數，結果一下不提防，俾對手摸咗鋪滿糊。到三月十五號就打埋最後一鋪嘞，曾先生要繼續守和吖，還是嘗試搶攻呢，相信曾競選辦嘅人員，大傷腦筋。
又唔係人人都以為梁家傑贏咗場答問大賽嘅，秘書V就話佢哋一家人覺得梁家傑貪口爽，都係曾蔭權實際啲。香港人比較講實際，唔講願景，故此答問大賽後嘅民調顯示，梁家傑雖有得分，但如果即刻選舉，曾蔭權會大勝。
次日打聽消息，曾營方面有認輸傾向，覺得曾先生輸在太拘謹，太依劇本行事，冇臨場發揮，此乃大熱門領先人士之通病與包袱，不足為奇；梁營方面就好興奮，士氣大振，覺得背水一戰馬到功成，皆因梁先生係好學生，聽教聽話，臨場發揮得非常理想，完全唔似平時說話嘅模樣──關德興飾演黃飛鴻。
不論誰勝誰負，曾梁答問，電視直播，已創下香港歷史性紀錄，為後來者樹立先例，到咗二○一二年，即使仍然冇雙普選，仍然係小圈子選特首，候選人應該唔止一個，答問與辯論一定會有，令到小圈子選舉更加公開化、透明化。同時，對內地亦有示範作用，內地地方領導人現由中央任命，內地人睇完香港特區之曾梁辯論之後，內心點會唔產生民主訴求呀？
以此觀之，雖然曾生競選必勝，但不能阻擋民主訴求之潮流，唔敢拒絕與梁先生玩答問/辯論比賽，故此梁生參選，明知不可為而為之，已為港式民主做了好事。反對梁生參加小圈子選舉嘅民主派，應該反省吓佢哋自己是否過於僵硬。