市況暢旺，城中差唔多每個禮拜都有大大小小嘅投資講座舉辦，散戶不愁冇得揀。好多主辦機構為咗增加叫座力，都會加入噱頭，好似英國巴克萊銀行喺18號搞嘅投資講座，除咗茶點招待呢啲指定動作外，同場加映即席抽獎，獎品係雙人來回倫敦機票連英超聯──車仔大戰阿仙奴（炮兵）嘅門券，計落肯定過萬蚊啦，夠晒大手筆，到時想唔迫爆場都幾難。睇怕其他行搞講座，都要加碼至得，咁要幾重手至夠？呢個要慢慢研究喇。
今次巴克萊銀行出手咁狠，原來係因為佢哋係英超聯嘅榮譽贊助商，即係話，呢次嘅獎品只係順水推舟啫。
至於講座主題係「如何運用嶄新投資策略，增加長線穩定入息回報」，華華認為，噱頭係其次，聽眾攞到有用資訊先係最重要嘅獎品。