歐洲足協盃已經去到16強階段，其中朗斯目標清晰，佢哋喺法足盃已出局，聯賽俾里昂拋離13分，數字上仲有機會，實際奪標無望，剩番可爭嘅係足協盃。朗斯喺足協盃主場表現唔錯，4戰3勝1負，不過輸嗰場係衰喺今季國內作客都未贏過嘅帕爾馬腳下，唔知有無心理陰影？
對手利華古遜情況相若，德甲冠軍無「行」，唯一可以望嘅又係足協盃！雖則利華喺呢個賽事作客無贏過，4戰3和1負，畢竟不敗率有7成半，近期防守亦明顯改善，先後喺聯賽擊敗過史浩克04同史特加，今場只要保住唔輸，次回合返主場仲可以同你死過！
布拉加絕對靠主場搵食，足協盃主場4戰全勝，不過贏嘅只係基爾禾、利巴域、草蜢同帕爾馬等，未受過真正考驗。熱刺幾經辛苦，前晚喺英超反勝韋斯咸4:3，士氣大振之餘，亦攞聯賽作客3連勝。熱刺今屆喺足協盃作客都靠得住，3戰全勝兼0失球。論兩隊近況、級數同整體人腳，點都係熱刺秤先啲。
阿鵬
有線球彩台主持
電郵：[email protected]