音樂發燒友David一向不屑聽MP3。「如果黑膠碟是橙，MP3只是粒有橙味的糖，完全是兩回事，你唔會喜歡。」David說CD的頻寬只有兩萬周，但黑膠碟約有五至六萬周，人的耳朵只聽到約一萬七千周，但其實人的皮膚都會感應到音樂，所以每次聽高音如小提琴，都明顯聽到音色的質素。CD轉MP3經過壓縮，無論高音或低音都無法去得盡，這就是失真。07年，各大唱片公司為救低迷CD市道，大出黑膠碟，仲有專用唱盤錄製MP3，各位儲定錢迎LP潮。
記者：馬靜兒 攝影：林栢鈞
Model：Chimp
Howitworks?
07年各大唱片公司玩黑膠潮，連ＨＭＶ都有得賣。即時想起舊式唱盤，可惜唱盤只限在家享受，要帶出街聽？惟有自己土炮式駁線再轉做MP3格式啦！
其實黑膠碟有一批年輕人市場，日本就新出一部USB黑膠碟唱盤，可將黑膠碟音樂以USB轉化成MP3Format，失真率無咁高，等於可以帶埋黑膠碟出街聽，阿爸阿媽年代的斷市黑膠碟可以重見天日啦！
單看USB黑膠碟唱盤本身有點似玩具，其實有點質疑可否將音樂數碼化，於是第一時間問店主，究竟有何特別？他即答：「可以將你阿爸阿媽年代的黑膠碟音樂轉做MP3歌，入咗電腦你更可以自己燒碟，聽碟又得，聽MP3又得，都是第一部機可以做到，你話係咪好吸引？」
黑膠碟原汁原味
講得咁勁，找來Anti-MP3的David試機，由他來品評。他說以往曾有一些唱盤可以將黑膠碟複製成CD，但因為機身燒碟機的質素問題，未能發揮黑膠碟音樂的原音，但這部唱機可以用USB直駁電腦，利用跟機的軟件，將歌曲傳入電腦，然後將音樂檔轉換成MP3格式，輸入MP3機，應該可以將黑膠碟的音質失真機會大減，更能保留原汁原味。
SimplewaytomakeaLPMP3!
黑膠碟有市場
同時，坊間多了唱片舖賣黑膠碟，這是因為需求增加，商人見有利可圖，當然會入些同黑膠碟有關的產品。David說在網上都看過這部機，對它甚有期望：「多人買黑膠碟，都會想將歌轉落MP3，方便出街聽。」
轉換過程簡單
由唱盤轉入電腦是WMA格式，而現時大部份MP3都支援WMA。如果用緊的MP3不支援WMA格式，就要再用Software轉MP3的格式。
由於iTunes能自行轉換適合iPod的格式，只要將音樂檔拉入iTunes入iPod就OK！整個過程都頗簡單。
美國/香港CD市道唔好 LP打救市場
好多過往無賣黑膠碟嘅唱片舖都開始賣番LP，原來唱片公司響CD市道低迷的情況下，復刻有把握的曲目於LP賺錢；據知07年排住隊出嘅黑膠多到得人驚。美國亦一樣，CD銷量不斷下降，而LP相反每年有十多個百分比的升幅。
其實音樂軟件步入數碼年代都就快30年，睇住成班樂迷由CD到音響發燒族玩HDCD、DVD-A、XRCD、SACD……同一隻碟又要出唔同嘅版本去對應，機都未壞又要唔停咁換，搞到屋企隻隻碟都有五、六個版本。最攞命係全世界本本音響雜誌一個二個話事人仍然係同一個結論：「始終係黑膠唱片最靚聲！」
三月份就有以下幾張矚目黑膠碟：
傳媒界：音響技術25周年銀禧紀念-本地音響雜誌所炮製，輯錄首首靚聲好聽，每套盒面仲有獨立編號呢！
外語流行曲：NorahJones-NotTooLate-黑膠碟一推出，唔夠三日斷晒貨，LP版人聲靚過CD好多。
爵士歌唱界：DianaKrall-FromThisMomentOn-世界一致公認的爵士歌后，新專輯黑膠版不愁銷路！
爵士音樂界：HereAtLast-一張有口皆碑、斷版多年的經典爵士樂錄音，日本知名的天碟錄音師神成芳彥親自錄製，不知道還有多少位朋友記得碟內鏗鏘兼粒粒通透靚絕的鋼琴音色呢！
本地流行曲：港樂‧克勤Live-本地通常只出復刻黑膠碟，呢張專輯出LP是頭一趟，收藏價值自然高。
本地發燒界：SusanWong-ANightAtTheMovie-如果發燒界選香港最受歡迎女歌手，金獎得主必然由Susan奪得，本碟係第二張LP，聲底比CD甜潤。
國語類：蔡琴經典及機遇-鍾意聽蔡琴都知她擁有磁性的嗓子，只有LP先可以真正感受到蔡琴這份攝人的魅力，而這兩套LP係坊間最值得買。
中樂類：閔惠芬-天弦-06年這張二胡天碟橫掃整個東南亞發燒市場，無論CD、金CD或XRCD都賣個滿堂紅，這套於月底面世的盒裝黑膠版特地於美國最有名的RTI廠壓碟，限量發行3,000套。
古典樂：LaFilleMalGardee-芭蕾音樂碟王《奶媽》的LP版本過多去先後被再版過兩次，最新的復刻版當然唔夠原版靚聲，但音色卻比之前兩次再版優勝得多了。
文：李廸偉
USB黑膠碟唱盤
售價：$3,380 JCSHOP（31022783）
Verdict：
原音8成 有驚喜
David帶埋自己珍藏碟《MELODY》試機，最初以為佢會質疑這部「玩具」，但佢一知道經USB過入電腦，就估計音質應該可以保持到。大家都好認真咁放入唱片，將碟內的音樂數碼化轉入MP3試聽。試聽後，他都說有驚喜，比想像中好好多，做到黑膠碟原音近八成。他更興奮地說，入咗電腦就可以燒碟，可以入落「手指」用汽車音響聽，可以入落MP3和iPod聽，每隻碟選一首歌入落MP3，自製黑膠雜錦碟。
Whattheysay? "Great！"
Cat：小忌廉？但在朋友屋企聽過黑膠碟，估唔到可以錄落MP3聽。
Alan：好多人愛聽黑膠碟，因為想起細個時自己死慳死抵儲錢買碟，有感情分。
Joey：原來濱崎步都有出黑膠碟？真係唔知喎！我唔識分音質好唔好，只知好聽。
Chris：細個有聽黑膠碟，可以落MP3當然好，攞舊碟出街聽，味道唔同㗎！
Ivy：話畀阿爸聽佢儲埋的碟，可以過落我部MP3度！聽吓佢究竟喜歡聽咩歌嘛！
