看着《高達無雙》的高達拿着激光劍喪打上百個馬沙戰士，眼框突然一行眼淚，因為遊戲景象好像兒時被阿媽打一樣，母親手上發光藤條，在家中狂追亂打，我和姐姐兩個馬沙戰士身上的傷痕，壯烈得和《高達無雙》一樣；今天母親年過65，看着這個畫面的圖片，竟然笑了出來：「我邊有打得咁厲害呀，哈哈哈。」
記者：伍旋卓
電視遊戲雖然十中有九是「打」，但遊戲公司會加入找武器、入迷宮等情節，《高達無雙》不同，將「打Game」推至「癲峯」，遊戲由開始打到終結，不須用腦。我們視這種「打嚟打去」的遊戲為發洩工具，而《高達無雙》已將這種發洩精煉出來——特純喪打。打完一身汗，頭暈暈，很舒服，怒氣全消，我試玩完，只歎這個Game遲來了二十年，當年激怒母親，只要給她打一趟，發洩一下我們會幸福得多。
打得暢順
不說暴力意識，4歲至70歲的人都會覺得好玩，拿着手掣，手指不斷㩒，三連星、賴巴和馬沙越打越多，不消一會，出現千軍萬馬的場面，三四分鐘就斬殺清光，滿足感絕對100分。另一個暢順是畫面，最終有過百位戰士出場時，不會「窒機」，Game迷真的要投降。
看Game專家陳福榮的試打報告，說得頭頭是道，有戰術、有方法，但自己打過，原來秘訣就是邊走邊打，太多敵人就避一避，和足球一樣拉開來打，又或者側側膊讓僚機幫你，全賴這個縮骨打法，一次又一次過關，只要手指不抽筋，完成6個Level應該不是難事。當然，你要打得高分，就要跟足攻略來玩。
高達人物豐富
除了打，《高達無雙》另一個重點是人物，它包括《機動武鬥傳G》和《新機動戰記W》內角色，他們可配搭不同武器，愛看高達動畫的人一定不會失望。可惜，《高達無雙》的畫面多以第一身為主，所以打鬥時的動作變化不大，未能欣賞細緻的對打動作，如果可以像《GT4》賽車加入多角度畫面重播，相信會有更多Game迷畀錢入貨。
試玩報告：加Dash操作爽
《高達無雙》有俾玩家互抽嘅二人對戰，以及瀏覽取得機械人外觀與其他資料嘅圖鑑模式。單就對戰嚟講，佢分為3種唔同嘅玩法，例如1on1或者喺指定時間內殺敵鬥多，仲有最特別嗰種先靠不停虐殺卒仔狂執道具，等到限制行動範圍嘅圍欄打開，就可以衝向對手處盡快解決佢，比起純粹對打帶有多啲戰略性。
其實操作大致同過往嘅《無雙》分別唔大，但加入咗遠程武器雷射槍令到玩法變化更大，再者可以Dash速度感當然更上一層樓，令人意外地即使成村敵人都唔會窒，啲機械人亦好有質感郁得幾自然，有PS3機都應該考慮呢隻Game。
文：陳福榮
機種：PS3
廠商：NBGI
類型：ACT
人數：1-2人
價格：$438
