大鑊！碧咸受咗傷！真係講都唔信，佢今次竟然係處理罰球嗰陣整傷右膝，而呢次意外「自殘」分分鐘累球隊歐聯出局兼重返國家隊無望，你話係咪好大鑊先？
呢單萬人迷自殘案，喺前晚西甲皇馬1:1和基達菲時發生。我求大俠睇住碧咸滿場飛，又傳中又有個波中柱，差啲以為佢打緊曼聯呀！到60幾分鐘，佢用私家右腳射罰球後摸住右膝面部扭曲，冇耐仲被換出場。
據講除碧咸外，雷恩斯都肯定唔會隨隊出征拜仁，對於一旦聯賽、歐聯雙失，將隨時收大信封嘅教練卡比路嚟講，今次等同於冇咗隻右手！
重入英軍難上加難
最陰功嘅當然係碧咸本人，因為近日傳媒都講緊佢重返國家隊嘅事，點知今次突然間受傷，雖然傷勢唔係好嚴重，但對年紀有番咁上下嘅佢嚟講，要幾時先恢復到近期咁「弗」，先至係大問題！其實，英格蘭本月歐國盃外圍賽會對以色列，名宿連尼加同奧雲都呼籲英軍領隊麥卡倫重選碧咸，而呢位冇乜性格嘅領隊亦打算轉軚；所以今次碧咸糟蹋良機，真係好唔抵。