中國海外（688）主席孔慶平，上周末率眾高層同記者朋友拜年，華華記得，孔總喺狗年呢個時間忙到唔見咗人，莫非今年會較清閒？非也，孔總擰擰頭話，好耐冇放過假，密密麻麻嘅工作已安排到5月，仲係要周圍去，差唔多環遊神州嗰隻。
鬼咩，中國海外嘅業務喺勻神州10多個城市，事事親力親為嘅孔總成日要四圍去，家陣真係老總唔易做。
孔總同華華講，大陸每單刁都數以億計，梗係要親自去睇吓先做決定，喺成都就試過一口氣連睇七八幅地皮。不過，佢話環顧所有地區，睇嚟睇去，都係大陸項目最吸引，所以辛苦啲都冇計。有老總落手落腳親自昅實，688嘅小股民應該飲得杯落。