大市掉頭急挫，好多走勢出現突破嘅股票，被呢條絆馬索一拖，紛紛打回原形，但呢啲只係短暫嘅衝擊，長遠而言，每一隻股票都有其本身的走勢，唔會太受大氣候所影響，所以，唔少被大跌市「拖低」嘅股票，反而係低吸嘅大好機會。
香港建設（190）橫行近3個月，上周先以大成交而衝破去年11月底的1.65元高位，衝上1.76元，走勢上明顯出現突破，但被大跌市拖累，最低落番1.44元的徘徊區水平。今年1月10日，推介港建，當時股價1.50元，短期上升目標1.65元已超額完成，家吓又有機會買番，中線仍以2字頭為目標。
過去4個月，港建做咗兩次「披成」，去年11月配售6.6億股，售價1.10元；第2次係上月中，配售5.87億股，售價1.37元，另外主要股東（PentaInvestmentAdvisersLtd）以同價認購1.42億股。
配售完成後，大股東黃氏家族持有26.2億股（54.44%）、Penta持有6.13億股（12.74%），其他董事持有6760萬股（1.4%），今次配售承配人持5.87億股（12.21%）、公眾人士持有9.24億股（19.21%）。
兩次配售，貨源大部份被基金接去，若扣埋上海建工持有的4.9%，街外貨源更疏。
大股東逐步注資
港建原有資金7億元，加入兩次集資之數，合共有21億元，用作支援集團兩大業務，地產和風力發電之用。過去兩個月，集團進行注資，收購上海及天津的地產發展項目，合共斥資10.3億元，餘下仍有逾10億元，擴充業務。
港建在內地擁有多個地產項目，分別位於天津、浙江南潯、上海虹口區地王、深圳地王商業中心及北京京廣中心等。上次推介時，話大股東已安排將價值60億元的上海項目分段注入，第一步係將港建持股量由10%增至25%，果然兩日後就成事；下一步，將會係增至50%。
港建現時發行股數有48.13億股，大股東話到明要將港建市值壯大到100億元以上，只要股價「坐二望三」就可實現。
郭兆誠