花旗股市上個禮拜五又唔見120點，今日港股會點，大家都心中有數，收市之後滙控（005）公布業績，明日會唔會插多啲，或者借壞消息公布反彈，就要睇兩個因素，一係今日港股跌幾多點，二係花旗股市今晚會唔會再大跌。
無論如何，大市彈唔彈，相信都唔會益到啲股仔，二三線股跌得咁傷又咁全面，莊家呢啲時候多數都唔會推番個價上去，除非唔托唔得，好似話唔托就會俾人斬倉，又或者有啲嘢做緊，唔可以玩突然死亡，不過，兩種情況都唔係好嘢，因為如果其他股仔繼續插，呢啲股份都唔會托得住。炒股仔好多時都係聽消息，千祈唔好咁天真信個線人話冇有怕，繼續揸，線人有時都有苦自己知，自己都成手蟹貨，點叫你沽？況且，真正稱得上線人嘅少之又少，可能5隻手指已數晒，你識嗰個係唔係，自己諗啦。
全球股市下跌嘅形態越嚟越有股災feel，大家嘅警覺性要提高，「眾人皆醉我獨醒」同「眾人皆醒我獨醉」好多時都係一廂情願嘅自我蒙蔽，謙虛啲，唔好咁貪，大家睇個市都會清楚啲。股災同大跌市嘅特點有相同嘅地方，就係消耗性下跌，間中有反彈，引你追，跟住再插。
滙控P輪2256：一個禮拜前介紹過滙控P輪2256，當時個價係56仙，上個禮拜五就企喺69仙收市，正股已跌穿250日線，現價136.40元，今日公布業績，如果今日跌穿135.40元收市，短線好大機會下試130元。2256槓桿率19.8倍（有效16.1倍），對沖值升到0.81，正股見130元，2256會升上1.15元樓上，可以睇位加注，正股上破140元沽出計數。
俊樺