豬年伊始，鑲鑽石嘅王老五靚仔老闆，為佢間燕窩小店，搵到主好人家，嫁咗畀番鬼佬！講起燕窩小店，除咗當年燕窩教父天價過檔，佢哋嘅前靚仔師爺「寒背」，亦算係一個傳奇！
話說當年昂藏六尺，個樣又四正嘅「寒背」，響所謂名氣界埋到好堆。跟住好快，就有有心人將佢推薦畀靚仔老闆，靚仔老闆見佢唔打得都睇得，至少唔失禮自己，於是首肯畀佢入燕窩小店做師爺。
挾住個朵 縱橫夜場
「寒背」份工唔知點解「零舍」他條，閒時只係見佢接受訪問，但唔係講燕窩店嘅嘢，而係講吓名人生活品味（即係晒靚表講玩車心得），有時又見佢搭埋啲女藝人上娛樂版，更重要係間唔時同靚仔老闆，一齊登入啲乜乜物物財俊、鑽石王老五榜，風頭一時無兩！型就梗係型到痹啦，但亦都因為咁，成為佢食豉椒炒魷嘅導火線！
所謂打工最忌功高蓋主，靚仔過老闆呢樣都仲話係天生，冇得講，但「寒背」高調成咁，好快就開始令人唔順眼，更衰係佢挾住靚仔老闆身邊紅人呢個朵，縱橫中環夜場，大把靚女諗住借佢埋靚仔老闆身邊，個個都爭住請佢食好嘢，咁佢就免費食咗好多餐！之不過佢本身都有實力，唱情歌、幫女擋酒頂枚、跳慢舞瓣瓣精，「功力」分分鐘高過有遊艇有飛機嘅靚仔老闆！
後尾「寒背」嘅壯舉傳到靚仔老闆耳邊，積積埋埋咪冇得留低囉！只可憐嗰班以為搵到人生目標嘅雌性動物，好嘢就請咗呢個師爺食，但連靚仔老闆嘅影都未見過！
[email protected]