上禮拜五發生咗一場細價股股災，三四線股跌幅超過一成嘅，比比皆是，個別更一度急跌4成以上，鍾情炒細價股嘅散戶相信係受災最重嘅一群。有報章計過數，上周五港股市值蒸發470億元，全日下跌股達781隻，較02年「仙股股災」當日574隻股份下跌，市值損失58億銀嚴重得多。
翻查跌幅榜，有幾類股份暫時都係高危類別，首先係上市時PE已定得頗高，但上市後繼續狂炒，呢類股份包括埋新上市嘅滙源果汁（1886），因為現年度PE已經超過50倍，雖則話係國內龍頭兼高速增長，但係遇上炒家資金撤走，現股價偏貴卻係最實際嘅沽貨理由。
第2類係今年升幅特大，只炒注資概念，實際業績麻麻嘅公司，呢類股票包括中航技術（232）同埋東北電（042）等等。第3類亦係短期最危險嘅，就係有對沖基金入股嘅轉型股同埋概念股，雖然概念仍在，但係由於好多呢類基金係透過借入平價日圓同做大槓桿嚟投資，故此一旦被迫拆倉，實係沽得最狠嗰類。
睇番跌幅榜，上星期上跌幅榜嘅139控股（139）獲Penta睇中並增持至11%，由於呢間公司股權極度分散，Penta已係「見得到」嘅最大股東，一旦Penta沽貨，肯定大鑊。之但係捱過呢轉拆倉潮，呢類股票亦都好有可能彈得最勁。
中華藥業等位買貨
中華藥業（8120）呢隻創業板股上星期過咗AGM同EGM，通過發行新股集資建議。呢間公司主要透過JCB生物生產植物性益生素，即動物飼料，產量每年達80噸，可餵飼22萬頭生豬，另向動物用藥及疫苗發展。原大股東汪世忠配股後股權大幅攤薄，加上原主席汪世華都已退任主席，汪非非辭任執董，頗有汪氏淡出之味道，新管理層上場或一番作為，呢隻另類農業股可候低收集。
歐陽風