受內地A股下跌拖累，影響全球股市相繼跟跌，港股都唔能夠獨善其身，近幾日恒指已經跌近1,400點，就喺一片淡市氣氛籠罩下，《Uwants討論區》有網友以打油詩，紓發佢哋對股市嘅睇法，當中有人話大戶出貨，但散戶懵然不知仲喺高位接火棒；亦有叫人最緊要鎮定，唔使咁驚青，認為跌市就係考大家眼光同定力嘅時候，隨時可以趁低位買靚貨。
網友1234先寫為敬叫大家接落去：「大戶在派貨，散戶不設防；若要你滅亡，先令你瘋狂。」即刻就有網友回應，carkit承讓咁話：「大戶在震倉，散戶不要慌；若要變小康，出入考眼光。」仲提議大家趁業績公布期，揀啲優質股低吸，好似交行（3328）同港交所（388），博佢哋公布靚業績之後，股價好快會回升。Kewell仔深表同意，又大贊carkit對得好押韻，非常厲害。
升市無錢買 跌市無膽買
玩到興起，唔少網友加入「戰團」，網友xtb提醒話：「大戶派完貨，散戶懵不知；以為大平賣，誰知接火棒！」YOYOYO07就回應：「唔見大戶買，散戶邊敢買；你咁鍾意買，好易變死蟹。」
328仲股仔自嘆：「大戶撼散戶，戶戶個個苦；苦無機會沽，沽錯更無辜。」指出散戶現時嘅苦況；chanhinyu亦自嘲：「升市無錢買，跌市無膽買；反彈呻無買，終日長嗟歎。」