美國紐約一間肯德基家鄉雞（KFC）同TacoBell快餐店，早排被揭發老鼠為患，打烊時有大批老鼠喺店內開「派對」，仲畀衞生督察勒令停業。MoneySavvy-MSN喺《MSN討論區》問：「呢單醜聞發生後，你哋仲敢唔敢再幫襯肯德基？」
crjr0203講：「咁多老鼠四圍走，令人惡心，我嘅原則係──任何餐廳如果畀衞生當局下令停業，我以後都唔會再幫襯，所以我唔會再去肯德基食嘢。」ARCHIEtheDRAGON話：「今次事件令我對肯德基嘅衞生失晒信心，佢哋唔使旨意再做我生意。」
MomaOf1講笑咁話，肯德基嘅櫃枱咁高，係為咗遮醜，因為櫃枱後面可能唔係咁衞生，話唔定仲匿埋好多老鼠。
schildi就講句公道話，認為唔單止係肯德基，其他快餐店亦可能有老鼠，所以唔應該淨係針對肯德基。
GarishRed_Herring講：「老鼠之嘛，有乜咁大不了？有啲餐廳職員去完廁所冇洗手，就即刻整嘢食，咁樣仲得人驚。」
喺TacoBell快餐店做過工嘅BarbaraFl話，有啲年輕員工缺乏衞生意識，製作食物時冇戴髮網，令啲食物好易被污染。
顧客好易忘記 照幫襯
擁躉CRONEWITCH話，肯德基今次被揭發有老鼠，只係個別事件，其他分店嘅衞生未必一樣咁差，加上顧客好快就會忘記呢單醜聞，所以肯德基嘅生意應唔會大受影響，「𠵱家係趁低吸納肯德基母公司YumBrands股票嘅良機。」
肯德基舊年被發現14次違規，包括職員個人衞生有問題、食物經常發現曱甴，同埋老鼠喺店內出沒等。