上個禮拜五係細價股嘅災難日，唔少細價股都勁跌兩三成，好似中國航空技術（232）急挫31%，早輪被熱炒嘅中國水業（1129）亦插水近三成，百靈達（2326）及東北電氣（042）分別跌28%及27%，唔少手揸重貨嘅散戶唉聲歎氣，《香港討論區》同《Uwants討論區》亦瀰漫一片愁雲慘霧。
twisterii形容當日嘅股市簡直係「血染的瘋采」，tonytsang話：「簡直係大戶開坦克車撞死散戶！」
網友正與奇奇中奇就話唔好唔信邪，「星期五個日係農曆正月十三日星期五，仲唔係黑色星期五！我𠵱家嘅心情就只有慘·慘·慘，都唔知幾時先至止血，惟有斬纜！」
大戶有秩序派貨
Wuchisum認為係大戶聲東擊西，暗度陳倉，出貨掠水！「大戶即係大戶，星期二個市勁跌近500點時都唔心急出啲細股，因為知出都冇咁多人去接，所以就先出晒啲大貨；當個市定啲，做個假反彈，再嚟個突擊，出番晒啲細貨！星期五升市表面上係歌舞昇平，內裏就雞犬不寧！」
Supertel牙痛咁聲話：「我隻萊福資本（901）明明朝早仲賺成7000幾蚊，衰貪心，無放到，搞到𠲖家要倒蝕！」T.Time亦話蝕到入骨，而Ballball506更全部貨都坐艇。揸住優能數碼（8116）嘅50119130亦好慘咁講：「隻股今早升22%，𠵱家反插13%，來回唔見咗35%吖！」不過，艾奧利斯就話：「細價股風險咁高，無業績支持，跌都係好正常嘅事啫！」