【本報訊】曾蔭權在首次特首候選人辯論大會上表現平淡兼生硬，成為城中焦點，自由黨主席田北俊（圖）指，整個辯論由頭到尾「全部出咗事」，曾蔭權答問既沒有深思熟慮，又沒有組織親自己的選委作出提問，曾蔭權競選辦公室肯定需要作出檢討。大多數電台聽眾也批評曾蔭權表現，商業電台聽眾鄧生更揶揄：「曾蔭權想扮謙卑、溫文，但失敗咗，手騰腳震，成個小媳婦咁，演技仲差過特約演員，但就內定做最佳男主角。」
矛頭直指李國寶
田北俊直指曾蔭權選舉班底有問題，例如競選辦主任李國寶，除了籌錢根本不會搞選舉，「佢（曾）永遠都係自動當選，幾時選過啫？一場仗都未打過，點去打仗？」他說：「梁家傑平時麻麻，但我噚日覺得佢非常好，超乎佢平時嘅表現……從辯論嘅角度睇，噚日係梁家傑贏。」田北俊指，若要批評就是梁家傑「猛擦北京鞋，煮死啲商界」，梁隻字不提平反六四，但認為商界只有官商勾結。
田北俊表示，他昨天與民建聯有討論，不明白為何曾蔭權不動員友好選委進攻對手，「冇理由八成問題都係梁家傑嗰邊入，得兩成係特首嗰邊」，但指自由黨無意提一些「擦鞋問題」。
若遇陳太仲騰雞
另外，辯論大會昨日亦成為各電台烽煙節目討論焦點。商台《在晴朗的一天出發》聽眾李生批評曾蔭權輕佻，若昨天的對手是前政務司司長陳方安生，「曾蔭權仲騰雞！」聽眾孫小姐給梁家傑95分，曾蔭權65分，「梁家傑表現鎮定，入位入得好好，曾蔭權好震，講嘢又唔掂」，只會討好商界。不過，聽眾林太認為曾蔭權較佳，因為梁家傑說話空泛，「冇承擔，唔覺得佢合格。」
港台《千禧年代》聽眾馮生形容，辯論是精采的攻防戰，但曾蔭權較務實。家庭主婦洪太對曾梁也不滿，認為「曾蔭權表現令人失望，梁家傑論點又無point，淨係識話人，渣過小學生辯論。」