余廸偉（廸偉）、鄒凱光（海灘）同有耳非文（阿非），3個人3種不同口味：廸偉愛精華、海灘愛新鮮、阿非愛特別。要一次過滿足到3個人，3月份當造的雅枝竹（Artichoke）就可以。3個人約埋去意大利餐廳Sabatini，齊齊試食用雅枝竹做成的菜式，順便為今晚開始的商台新節目《午夜閒談》度度內容。
記者：梁學文
攝影：譚盈傑
煮法多元化
3個人會走埋一齊食飯，是因為今晚會一齊主持新節目《午夜閒談》。一見到雅枝竹，食極唔肥的廸偉爭住介紹，「我好鍾意食呢個菜，以前喺外國都有食過，不過就係淨食，或者當係沙律。呢度嘅做法就好多元化，炒、燜、焗做齊，原來煮過都一樣咁好味。」廸偉一路食一路講，仲食到唔停口，就知他有幾鍾意食雅枝竹。
身旁的阿非以前都有去過外國食雅枝竹：「我喺法國嗰陣，法國酒吧會成嚿雅枝竹上，當係個小食，唔會有咁多煮法。淨食嘅話會韌啲，嗒吓嗒吓咁，有排咬。」的確，雅枝竹無煮過的話，個皮會較韌，無牙嘅都幾難食得到。「好多人都唔食塊葉，其實入面好好肉，最好就係舔住嚟食，真係好正！嘩，真係好似……」喂！廸偉，咪當𠵱家做緊節目，有關性的內容，都係留番今晚至講啦！
歐洲菜王雅枝竹小檔案
堪稱歐洲蔬菜王的雅枝竹盛產於歐洲南部，屬於菊科類植物。每年有兩個當造時候：3月至5月及9月至12月。別看雅枝竹一大棵，就以為它很有肉，其實一大棵雅枝竹只有花心和葉的部份可以食，所以好矜貴。其實雅枝竹非菜非果，而是未熟的花蕾，入口有些少苦味，不過食落就會有種甘甜味，加上卡路里低，無脂肪亦無膽固醇，多吃有助保肝和降膽固醇。
師傅張錦權心得
．雅枝竹主要有2造，春天嘅比較好，味道較秋天嘅鮮甜。
．雖然1年有2造，不過我只會喺春天做呢個菜，目的都係想將雅枝竹最好嘅一面表現出嚟。
．成個雅枝竹最好味係個花心。
．在揀選時要揀實淨嘅，顏色夠青綠至會用。
．一般意大利菜會用雅枝竹做配菜，不過今次配角就搶了主角的風頭，甚至比主菜更吸引，好似今次雅枝竹就安守本份亦突出主菜，好搶眼！
傳統炸雅枝竹伴意大利火腿$235
手切意大利火腿是Sabatini的招牌菜，伴以用熟油淋完再炸的雅枝竹，一凍一熱的食法夠過癮，意大利火腿入口即溶，炸雅枝竹的做法亦較少見，原來油炸可去除其苦澀味，繼而提升甜味，更易入口，值得一試。
意大利通粉伴雅枝竹、銀魚柳及西西里鮮茄子$245
意大利通粉用橄欖油同銀魚柳先煮，通粉面有坑紋有口感之餘，亦索到汁。唔用肉類改用雅枝竹做這道菜的配料，夠特別亦唔肥膩。最能引出味道的是銀魚柳，鹹香味重，更能帶出濃濃的雅枝竹味。
意大利鮮雅枝竹濃湯$135
雅枝竹由意大利南部運來，肉質較鮮嫩，味道亦較濃郁，用來煮濃湯最好。師傅將雅枝竹洗亁淨之後，加入白酒、雞湯、薄荷葉等材料放入攪拌機，攪勻後再煮。味道比較厚，入口稠身。
薄牛仔柳伴香濃雅枝竹白酒汁配黑菌薯茸$465
師傅先將牛仔肉薄切，然後用白酒同雞湯煎香，再加入雅枝竹同黑菌薯茸。別以為雅枝竹是配菜，其實這個配角更能突出牛仔柳的香味。雅枝竹入口帶甘香，如果可以配多杯SauvignonBlanc，咁就天衣無縫！
野蘑菇、茄子、新鮮雅枝竹意大利粉$245
簡單的菜名經已講明這個意粉的材料，Procini蘑菇味道清香，配合味濃的雅枝竹，一濃一淡，連埋意粉放入口，味道勁Balance！
香煎鴨肝配鮮雅枝竹意大利飯$280
鴨肝入口香滑，外皮脆卜卜。師傅先將Risotto煮到8成熟，加入雅枝竹再煮，令Risotto吸收到雅枝竹的香味。Risotto被白酒同雞湯煮過，亦加入ParmesanCheese，味道香，入口幼滑。
睇路搵食
Sabatini（27332000）
地址：尖沙嘴東部麼地道69號帝苑酒店3樓
營業時間：12nn-2:30pm、6pm-11pm
座位：100個
