自從「白癡」大肚後，佢老公「大風遮」要積極搵奶粉錢，所以向來慳家嘅佢就更加慳，除咗日日着舊衫、少去朋友聚會避免使錢外，甚至連買煙錢都慳埋。
侍應以為聽錯
大風遮間中會出席公司唱K活動，佢每次去親都一定嗌煙，但唔係嗌一包，一攞就係成條囉。平日大風遮嘅老細叫晒旗下班藝人唱K，大風遮趁機大吃大喝之餘，有次竟然叫女侍應拎兩條煙畀佢，女侍應仲以為自己聽錯，後來佢再講多次，人哋至知係真，於是就攞咗兩條煙畀佢啦，點知大風遮即刻將兩條煙「質」落袋，其他同事同師兄弟見到佢咁都得，就梗係唔執輸，趁老細忙緊應酬之際，一個二個猛叫女侍應攞煙，結果離開K房時，個個都手袋脹卜卜，但老細一路冇留意，結果照樣埋單。大風遮連咁嘅慳家橋都諗得出，真係好嘢！