有時為咗劇情需要，句對白有幾粗俗、班主角有幾爛口，又有乜所謂！唔係喎，原來呢齣戲係拎咗4項奧斯卡大獎嘅《無間道風雲》，「原裝正版」精警對白多的是，點解𠵱家句句變晒做粗口？你可以話荷李活文化就係咁，但係連繙譯出嚟嗰句都係粗口，唔止教壞細佬，最慘大人睇完都唔明佢講乜，斯文靚仔麥廸文忽變不文魔警，唔好啩?!
記者：陳國輝
句句粗口 睇到反感
唔係我特別挑剔，而係每句對白入面都應該有基本文法，起碼字幕寫得出嚟，必須要睇得明。最得人驚係觀眾睇得唔清唔楚之餘，原來仲有另一個含意，簡直係攞你命三千！成套戲151分鐘裏面，「金句」多到數唔晒，例如里安納度廸卡比奧被長官盤問嗰陣，長官講咗句「你唔X係警察」；跟住積尼高遜又忽然向神父彈句「那些小男孩，替你們吹簫簫……」，連「姨媽到」都繙譯得出，不得不寫個服字。唔使分析，作為成年人觀眾，斷估唔會認同呢啲助語詞有助故事發展，本來係一套荷李活電影，卻硬塞一大堆粗俗廣東話，以為咁會睇得過癮地道啲，睇嚟錯晒！
比一比 震撼程度輸晒！
評語：美版超搞笑，以為拎住對Timberland行山鞋就可以扑碎石膏兼對付埋里奧仔，天真得交關！
評語：記得港版黃Sir被掟落樓慘死一幕，美版出現一模一樣情節，不過座大廈得幾層高，冇晒氣勢。
評語：黑社會人物寫隻字都要型，港版《無間道》用原子筆，西片係用箱頭筆，Cheap少少喎。
搞笑！約卧底睇鹹片
我覺得呢套戲攞獎，證明鬼佬真係唔多識貨，換個角度睇，雖然《無間道風雲》嘅演繹方式明顯有別於香港原作，但講到底內容換湯不換藥，故事情節冇變，但係地點、環境等均作180度轉變。
香港版無間道場場戲都咁有型，但美國《無間道風雲》就場場搞笑，最搞鬼莫過於麥廸文靜雞雞約見積尼高遜嗰幕，你以為又係約天台、走廊呢類人迹罕至嘅地方？
通通都錯，兩個大男人竟然選擇喺播緊鹹片嘅戲院裏面約見，夠晒騎呢，積尼高遜仲無情情對住麥廸文玩不文動作懶Surprise；比起港版《無間道》，積尼呢個角色係要更加兇狠、殘忍、血腥，但總叫唔係一味要搞變態嘢。
美版儍強無厘頭最入戲
雖然劇本冇跟足原作，但其實經典場面都用番唔少，其中印象最深刻係儍強喺度估邊個係警察嗰幕。
大家仲記唔記得嗰句：「如果你同佢講嘢佢唔應你，佢就係差人。」嘅對白？其他精警對白如「三年又三年……」等都譯唔返做中文，好可惜，反而呢句可完全移植，認真難得；但講到最抵讚應該係美版儍強嘅高水準演技，佢抵死到連說話語氣、講嘢速度都好神似，比起靚仔廸卡比奧以及麥廸文嚟講，個人覺得佢最入戲。
