所謂「工字不出頭」，唔少打工仔都可能諗過創業做老闆，而傳統智慧就話，開業之前要寫好一份營商計劃書。不過，全球最大辦公室用品連鎖店Staples創辦人史坦寶（ThomasStemberg）就認為，商業市場瞬息萬變，企業掌舵人就算喺開業前已有一套周詳計劃，都要識得靈活走位、隨機應變，千祈咪一味死跟原定計劃。
寫嚟吸引投資
喺《WebWorkerDaily》亦有網友就營商係咪需要寫計劃書發表意見，好似RamiNasser就認為創業之初，有冇需要寫計劃書好視乎資金來源，「如果係自資創業，唔一定要做計劃書；而寫商業計劃書嘅主要原因，不外乎想吸引其他人投資。」
不過，newtimes唔同意佢嘅講法，「如果你冇計劃行事，就即係打算失敗，因為周詳嘅部署有助減低風險！」
AmieGillingham亦贊同，「一盤生意做定計劃書，設定明確目標按部就班進行，就冇咁容易迷失方向。」
wally123就話：「創業要有創意，唔一定要投放大量資金開展，但就需要具備某啲條件，包括識得將人哋成功之道照辦煮碗；而創意就更加唔少得，需要時刻發掘新商業元素，做一啲『前無古人』嘅大膽嘗試，當然仲要有無比毅力，唔可以輕言放棄。」
《EntrepreneurshipWeekUSA》就列出創業投資公司認為企業要寫計劃書嘅5大理由，包括：要藉此確定點樣開展業務、設定目標、搞清楚業務需要嘅資源、強迫企業進行相關分析，同埋建立信心。