𠵱家英超得番10輪比賽，數字上屈福特仲未被判死刑，但嚟緊仲要對熱刺同車路士，實際上同有一隻腳踏咗落英冠差唔多。而佢今場對手查爾頓近況明顯好轉，雖然之前輸過畀車仔同曼聯，但上場護級大戰怒炒韋斯咸4蛋，總算振奮吓士氣。可惜查爾頓今季作客淨係贏過樸茨茅夫！護級當前，兩隊都唔想輸，的確難揀：屈仔28場聯賽，「半場和」開咗18次，有6成幾；查爾頓作客14場，只係入咗9球，平均每場都入唔夠一粒。咁今場揀「半場主客和」嘅「和」好似勝算高啲。
比勒費爾德歇冬後，好似食錯藥咁5連敗，最叻只係摸和漢堡。唔經唔覺，佢已經有成4個月未喺主場贏過，對上一場贏亞琛係喺上年10月尾，咁嘅表現，唔買佢對家，都對唔住阿媽！
紐倫堡近況唔錯，連贏3場後，上場作客輸畀狀態大勇嘅緬恩斯無話可說！雖然紐倫堡𠵱家作客只係贏過兩場，但不敗率高達8成，仲係德甲作客失球最少嗰隊，「讓球」平手盤一於捧佢場！
阿鵬
有線球彩台主持
電郵：[email protected]