星爺周星馳經常俾記者影到喺中環鬧市踩單車，前晚佢又喺中環蘭桂坊出現，着住運動裝、頭戴Cap帽，一身sportylook示人，不過今次就冇踩單車。雖然冇咗兩個轆，但星爺一見記者，對腳就好似開咗turbo咁，行得好鬼快，令馮仁昭大開眼界。
其實前晚星爺身邊仲有個着西裝嘅斯文男人同行，估計星爺本嚟諗住同朋友去蘭桂坊飲杯嘢，點知撞到一大班記者，敵不過閃光燈狂閃，最後惟有拋低朋友，搭的士走人。
猛講新年快樂
呢排香港電影揚威國際，劉偉強繼《無間道》後，另一作品《傷城》同樣俾荷李活片商睇中，馮仁昭本來都諗住問吓星爺有冇荷李活片商睇中佢嘅劇本，但佢就冇答。再問佢對於香港電影咁威水有乜睇法？點知星爺即刻發揮其無厘頭本色話：「新年我哋唔好講呢啲住啦！」
本來馮仁昭打算叫星爺企定定傾一陣，佢話：「閃光燈閃住點答問題？」不過當冇人影相嗰陣，星爺仍然打算鬆人。雖然佢乜都冇答，只係猛講新年快樂，但咁有禮貌，馮仁昭點都要同佢講番句多謝晒嘅！