由演出處女劇集《新鮮人》至今，蒙嘉慧效力無綫7年，每個花旦爭到頭崩額裂、視為事業目標的劇后寶座，她揚言從沒想過，她也確實沒是非沒緋聞，與別不同。
不愛擦鞋
蒙嘉慧說：「可能我入行前做廣告，嗰時我同廣告導演講，唔做幕後，拍戲啦。佢話你拍戲咪又係做花樽，但點解要做花樽？女仔唔可以有演技咩？我唔係好叻嘅女仔，但會盡自己能力，女主角獎要天時地利人和，唔係一個人就得，要有其他嘢配合，set做最佳女主角，辛苦咗，會偏離自己條路，做好角色已經有其他bonus，咁樣諗會開心啲。
「冇寄望就冇失望，過程中又冇話踩邊個上位、冇話擦鞋，唔係社交溝通手法叻啲。係呀，我係差啲㗎啦，但唔係孤芳自賞，係真係唔識，只係識得認真讀好劇本，演好自己角色。」
「我性格唔夠積極，就算有機會，我都唔夠膽自薦，係欠咗入行嘅成功要素。我會勤力，要人記得我做過啲乜嘢，係做咗好耐，啲人都唔知我係邊個，有得與失，好嘅係少緋聞，但冇乜新聞好悶，其實兩面睇。人哋日日頭版，記者鍾意，我有乜嘢講？冇，但久而久之都冇乜損失，我唔睇報紙娛樂版。係咪鴕鳥政策？我知埋位後要做乜咪得囉，冇人完美，有人會睇到優點。」
自認麻煩
蒙嘉慧的直接，受得住會覺得她可愛，受不了就覺得她難頂，難得她有自知之明說：「記得拍《暗戰》時，導演（杜琪峰）睇完我演出，唔出聲行咗去，場戲要喊，但我真係唔得，蠢過隻乜，真係唔識。我又鍾意拗劇本，劇本實有啲唔順，以前好主觀諗到咁樣唔得，係我表達方式唔好，令人覺得蒙嘉慧麻煩。我唔介意收工收得夜，唔介意做多啲，唔介意俾人話麻煩，但大個睇番，都覺得自己真係幾麻煩。等如着衫，『嘩，好唔得！』可唔可以講『有冇第二件呢？』以前我只係講到問題，冇講到點樣真正解決，都冇諗過點遷就場戲，𠵱家覺得未必係咁，大咗好啲啦。」