鄭伊健曾演過一部電視劇《雙面伊人》，這個故事，一直在他的感情舞台上延續下去，做了7年女主角的梁詠琪，去年黯然下台。今天昂首踏上台板的女主角，是蒙嘉慧。
蒙嘉慧的臉上寫滿倔強兩字。工作上從不認輸、不擦鞋、不應酬，一力扛起家庭重擔。愛情上，她由過往的霸道與黐身，到現在學會溝通與遷就，她可以甜到漏地告訴大家，目前感情是「處於平穩狀態，幾順利，兩個人有溝通，大家目標一致」。
自言不溫柔的蒙嘉慧，只因她沒有胡亂發放溫柔。她的柔、她的甜，只會留給那位高叫「一個為你甘去蹈火海的人」。 撰文：朱倬誼
伊健篇「鍾意陽光感覺」
去年1月，伊健和梁詠琪甩拖，8個月後，他跟蒙嘉慧打羽毛球擦出愛火。常說戀愛中的女人最甜蜜，蒙嘉慧有辦你睇，一講伊健笑晒，笑得雙眼瞇成一線。蒙嘉慧和伊健在愛情路上都曾經滄海，不會再像從前般跟全世界大聲說：我們戀愛了。可是，從蒙嘉慧的說話裏，大家會找到她對愛情的答案。
對愛情有要求
對於目前的感情生活，蒙嘉慧甜蜜地說：「𠵱家嘅我處於平穩狀態，幾順利，冇話高低起跌，係咪好悶？好簡單？簡單幾好呀。我記得上年同周刊做訪問，我話對好多嘢好有要求，愛情世界入面都有我嘅要求，我唔會將我嘅要求降低，希望搵個同我要求一致嘅，呢樣到𠵱家都冇變。」
蒙嘉慧的要求也許簡單，但要碰上Mr.Right，說時容易遇時難，幸好入行時拍過檸檬茶廣告的「陽光仔」鄭伊健忽然殺出，他的陽光都曬到蒙嘉慧身上去。
「𠵱家要兩個人有溝通，大家目標一致，兩個人世界要兼顧其他嘢，仲有專一，覺得好緊要，我鍾意陽光嘅感覺。以前好無聊㗎，噏過好多次唔揀圈中人，因為打開雜誌，咁就封面啦，好驚，大大吓發覺唔需要，兩個人一齊開心就得，但細個時唔知，只會諗要高過我，又唔知點點點，咁表面㗎咋。」
過去10年，蒙嘉慧有兩段感情，一個是拍拖4年的設計師蘇卓航（EricSo），年前他已跟盧巧音譜戀曲；另一個是拍拖4年、從事廣告業的郭耀輝，前年他閃電結婚，新娘卻是蒙嘉慧的好姊妹。
曾經霸道倔強
31歲了，受過感情創傷的蒙嘉慧，再展開新戀情，會不會很害怕？她說：「驚㗎，但我會檢討有乜嘢問題，中間我發現我幾霸道，講嘢幾倔，身邊人會有hardfeeling，我覺得我幫佢諗咗，但因為表達唔好，佢唔覺，所以𠵱家會諗一諗、停一停，對做人做事都有幫助。相對好多女仔，我唔夠溫柔，要取捨，睇吓你想要個點樣嘅女朋友，如果過程唔開心，講乜將來吖？」
「諗番你哋話嘅打擊，其實好簡單就過咗，當時係有唔開心，試過失戀，但諗吓唔使拍拖多咗好多時間，睇啲積極嘢。過後睇番冇乜嘢打擊，可能肥咗10磅囉，因為一唔開心就食嘢，肥番健康喺度，唔係失戀就乜都冇，原來冇乜大不了，當時我又喺內地拍緊劇，當畀個考驗自己，跟住就一片光明。」
問蒙嘉慧，覺得自己稱得上好女友嗎？她哈哈笑說：「一定覺得自己好先拍拖㗎，我覺得自己好，但你覺得我唔係，有時都幾矛盾，惟有用時間證明我唔係咁霸道、咁自私，我唔係溫柔女朋友，諗番以前都有啲過份，以前好黐身，我係你女朋友喎，你得閒都唔搵我？要成日見㗎。」現在談情說愛，她明顯豁達許多：「順其自然啦，唔需要諗咁多，我簽咗畀TVB年幾，覺得仲有好多嘢可以試、可以做，唔想啲人focus我唔認真做嘢，係唔多唔少都會，同埋唔想牽涉第二個人。」
羽毛球好拍檔
說起鄭伊健，蒙嘉慧繼續形容他是羽毛球好partner，她拍拖的話，不需要向公眾交代，問她不認戀情是否因為壓力大？她說：「唔知，唔鍾意，都係經歷，一次失戀，講失戀就拖埋其他人一齊，跟住先發覺唔好講，係累積返嚟。」另一個可能是，怕別人將她跟梁詠琪比較，蒙嘉慧說：「唔會研究呢啲，唔識諗太遠，冇諗過怕任何嘢。問嘅，我盡量答，人哋都會尊重我唔想講嘅。」有人不講，理由是怕被唱散，她想也不想就說：「寫到冇鬼咗係溝通唔夠啫，我冇諗得咁遠喎。」她的信心，大家feel到了吧。
攝影：仇志德
服裝：DKNY
