今日係元宵佳節，祝各位有情人終成眷屬！元宵節來來去去都係食湯圓，其實都可以搞搞新意思，即刻請來最近又出咗新一輯烹飪書嘅袁彩雲，為大家度身訂做幾款元宵fusion菜，等你可以煮番幾味𠱁吓honey，博佢錫你多啲！
記者：趙珮倩
攝影：陳偉強
髮型：Michael@HairCulture
鳴謝：美麗華酒店提供場地
龍鳳佳藕
需時：30分鐘
價錢：$60/4人
材料：免治雞肉130克、海蝦6隻、紅洋葱1/2個切碎、蓮藕片6塊、鹽/糖/生粉各1/2茶匙、胡椒粉少許、原味乳酪1湯匙、番荽碎適量
做法：
先將海蝦以鹽/胡椒/生粉略醃；免治雞肉剁碎加入鹽/糖醃10分鐘，然後加入紅洋葱碎拌勻；蓮藕片撲上少許生粉，塗上免治雞肉，下鑊煎至兩面金黃；原味乳酪混入番荽碎，塗上雞肉蓮藕片；蝦煎熟，放上雞肉上面，最後以少許番荽點綴即可。
彩雲醒醒你：
如果隻蝦唔聽話，放唔穩喺蓮藕片上，可用一小截牙籤拮實，佢自然乖乖黐實佳「藕」坐定定。
金屋藏珍
需時：30分鐘
價錢：$40/1人
材料：迷你南瓜1/2個、紅洋葱1/3個切碎、德國香腸4條（切片）、日本靈芝菇100克、芝士碎2湯匙、黑胡椒少許
做法：
先將南瓜挖空備用；燒熱鑊，將紅洋葱碎/香腸片/靈芝菇炒熟，下黑胡椒調味，然後釀入南瓜中，撒上芝士碎，放入已預熱的焗爐，以280℃火焗15分鐘即可。
彩雲醒醒你：
德國腸本身好夠味，所以唔使落太多調味。
薑蜜湯圓凍
需時：45分鐘
價錢：$15/6人
材料：芝麻湯圓6粒、蜜糖4湯匙、薑3片、雪耳1/4個、杞子適量、魚膠粉2湯匙
做法：
先將雪耳浸腍切碎備用；湯圓以清水煮熟備用；薑片放500毫升水煲滾，下雪耳/杞子煮5分鐘，然後加入蜜糖攪拌煮溶，熄火後加入魚膠粉慢慢攪拌至完全溶掉，倒入器皿，加入湯圓，冷凍30分鐘至凝固，最後可放上雪耳碎點綴。
彩雲醒醒你：
湯圓係元宵必食，今次將佢fusion變凍食就冇咁悶。
情深意重
需時：40分鐘
價錢：$70/1人
材料：意大利Parma火腿50克、小椰菜2個切絲、番茄1/2個切粒、迷迭香1/2束、意大利全蛋麵100克、蛋汁少許、酥皮一塊、芝士碎25克、鹽/胡椒適量
做法：
煎熟Parma火腿，放入已煮熟的意大利全蛋麵，加入椰菜絲/番茄/迷迭香/芝士碎炒勻，下鹽/胡椒調味，盛起待涼；酥皮搓薄至3毫米，用模具裁出心形，兩層酥皮中間放入意大利麵，面層掃上蛋汁，放入已預熱焗爐，以280℃火焗20分鐘，見酥皮呈金黃色即可。
彩雲醒醒你：
麵有長長久久之意，呢個心形菜式祝天下情侶都愛得長長久久。
大時大節做大廚
以前淨係知道袁彩雲整甜品叻，估唔到佢仲煮得一手靚菜。最近剛推出第四輯烹飪書的她，坦言近年寫書多過拍戲，出完一本又一本，鬼叫外間反應好咩！朋友知道佢煮嘢掂，過年過節都毫不客氣要佢充當大廚，她說：「通常節日都會同啲朋友食飯慶祝，好似初一去拜年都會叫我幫手煮兩味，走唔甩，好彩唔使洗碗！不過難得有人欣賞自己嘅廚藝，都好開心！」今日元宵佳節，可惜彩雲仲未搵到對象可以為佢親自下廚，她說：「元宵係應該同心愛嘅人一齊下廚嘅！」咁就祝佢早日搵到個如意郎君陪佢一齊煮飯仔啦！
