阿仙奴派青年軍踢聯賽盃決賽，大部份時間壓住車路士嚟打，如果贏得出，直情係英國足球史偉大一頁，可惜一班生牯仔識放不識留，最後階段好似軟軟哋，卒之俾車路士搞掂咗，杜奧巴時時剋死阿仙奴中堅辛德路斯，個人入兩球，再次成為車仔救星。但雙方全場表現就俾一場「大混戰」搶晒鏡頭，高路托尼忍唔住氣，俾人掹衫就反應激烈，可講得話累親隊友。
足球員在場上打交，係嚴重事件。英格蘭足總就起訴昆士柏流浪隊，因為QPR與中國國奧隊踢所謂友誼賽變成中國功夫開片大賽，雙方大打出手，嚇親觀眾，但原來有一樣球賽係歡迎球員打交嘅，就係NHL（冰上曲棍球）嘞，鍾意在場上揮拳打人嘅球員，不如去學溜冰兼打波。
NHL近年球賽入座率雖然唔錯，每晚有萬幾人坐滿球場，但係現代商業體育係講電視收視率嘅，現場觀眾只會增加比賽氣氛，唔會增加球會以至NHL好多收入。意大利足球現在閉門進行，球場冇觀眾，仍然照踢，點解？因為電視轉播權早已賣晒，球會唔踢，財政損失會好大。
NHL恰好相反，球場滿座，但收視率大幅度下跌，冇場外觀眾有興趣。點至會有興趣呀，球員打交囉，故此NHL放寬咗懲罰球員嘅規矩，球證收到指示，對賽雙方球員打起嚟，未到真正傷人，只係推撞，用拳頭啫，球證唔會叫停或強行分開各人，甚至教練跳出場，參加打鬥，亦可以容忍。你話搞體育吖嗱，冰上曲棍球就係徹底向錢看，鼓勵球員粗魯，目的就係搵錢，冇電視收視率，搵鬼到錢咩。
一項叫做係球類體育嘅比賽，墮落成咁，吾不欲觀之矣，希望碧咸去到LA之後，可以吸引多啲美國人睇真正足球，提高美國嘅足球收視率，趁NHL走向低潮，取而代之，將足球成為美國四大體育之一，咁就對足球全球化有莫大貢獻，封佢做爵士又點話。