如果你還沒有看過楊學德的作品，而先聽到他人的評論，大概會想「有無咁勁呀？」。梁文道這樣寫：「我們可能正在目睹一個偉大藝術家的長成。」劉掬色：「他的成就，我認為是世界級的。」
而如果你先看到的是阿德的漫畫造型，而非他的故事，大概會想「有無咁核突呀？」記者第一次看到他筆下的學生妹，深綠色肥肥的面龐，配上桃紅色的嘴唇，歪斜的邪眼，突然感到一種想嘔、又想笑的荒謬感覺，再看完他筆下一個一個有點病態、鹹濕、搞笑抵死又黑色的小故事，有種久違了的歡愉感。
三聯書店月前復刻他斷市多時的處女作《錦繡藍田》，更撥出一個角落擺放其作品，身邊幾個傳媒/美術人，都以為他走紅了，卻原來他還在掙扎求存。
「我年紀不輕啦，三十中間，畫漫畫前打過多年工。現在替周刊、月刊畫漫畫，還有接Job畫插畫，搵食嘛……收入當然沒有比打工穩定。時多時少，做獨立漫畫家是很難生活的。」他笑說：「出書搵到幾多錢？印1,000本，行規係作者收10%。」有數得計，他的書售價不算便宜，$88一本，但賣得好、印兩刷一年心血也只是收$17,600，不能說不心酸。「總之畫漫畫係唔會發達囉！」
世界級的質素，不是應該有世界級的收入嗎？他笑着說：「我這個年紀，都差不多到不惑之年喇。好明白自己的Mentality根本不可能畫靚嘢，不可能做到好Mass、賣唔到感性，我唔可能做幾米嘛。啲OL要感性要人生道理，買幾米就得。」他在書的序言中自嘲：一個麻麻甩甩、半紅不黑的漫畫家，在書店偷聽少女說着對幾氏的心事，「閉起雙眼幻想着，有朝一日也要如幾氏般受少女歡迎：各款產品熱賣、故事被拍成電影、成為最富有的漫畫家。」
「我的生活不怎花錢，也不出街，沒有社交生活。每天醒來就上網看看新聞，很多故事都是由新聞扭一扭寫成的。」問他愛看哪類新聞，他有點不好意思：「無人鍾意睇嗰啲囉——國際新聞也愛看。逢星期一晚英文台（國際台）有個《全歐訊息速遞》，有時講講匈牙利農場近日有甚麼疫症，有時又講吓斯洛文尼亞議會選上甚麼議員之類囉。不過呢排電視壞咗，無睇囉。」
看阿德的漫畫，會疑問怎會有人畫得出如此醜爆的造型。就像醜小鴨幻想着會變天鵝，有一天照鏡卻突然發現長成了一頭怪獸。「我細個同大家一樣，睇《龍虎門》、《中華英雄》，鍾意睇小林源文，亦畫過靚嘢，不過好快就放棄咗。實在畫唔出靚嘢。」阿德笑：「我覺得自己受過野獸派Matisse影響，畫吓畫吓，自己就接受了。」
瘋狂的作品要有個瘋狂的腦袋。幾年前他辭掉雜誌設計工作，全職躲在家中畫《錦繡藍田》，可謂瘋狂，卻誤打誤撞畫到現在。「當年打工做到悶悶地，就申請了政府資助，其實得二萬幾蚊，只係夠印刷加菲林，仲係要搵到最平嗰隻喎。本來諗住半年完成，點知計錯數，畫吓畫吓畫咗一年。你知道畫漫畫啦，畫吓又睇吓諗吓，覺得唔夠好又改過，有時又有惰性。」
「期間成年都無點接過Freelance，結果聯絡斷晒，𠵱家想做都做唔番。壓力？有，不過我做開Freelance，屋企人見我日日喺屋企都唔知啦，況且我一直有照畀家用，就係咁用晒所有積蓄。當時都有拍拖，好彩女友體諒，可能係因為佢都係做呢行。又可能因為當時佢喺英國讀緊書，見唔到無咁眼寃。」他幸福地笑。要幸福回報總得有非凡付出，兩個月前，「體諒女友」已成了幸福楊太。
「後期諗吓，不如做少少唔花腦筋的工作，幫補吓，結果做過兩個月跟車送貨，送有機蔬菜，一日走五十幾個Order，放工已經散晒！」於是的起心肝，辭掉工作，在最後兩個月踩盡油把書完成。「臨畫完諗住出咗本書就搵工。」但還是把書當作卡片，共1,000張卡片，希望能延續漫畫夢。「本書諗住用嚟介紹吓自己，後來《東Touch》睇咗畀機會我連載，便一直畫。有次小克話不如拎上去三聯傾吓出書，我心諗小克得，自己都係『忟忟地』，結果竟然又出到書。」
「成了名」，也成了家，生活卻依然自覺沒保障；雖然視漫畫為不歸路，問到是否視作終生職業，答案卻是「希望啦，無人知㗎。」評論捧到上天，說穿了都是虛名。他只肯定今年仍會以漫畫養家，年內替三聯畫一本課外讀本（題材是正經八百的「物流」）、一本關於潮州人的書。「都會試吓其他嘢，同小克搞緊出ToteBag、Cap帽等Product。」記者安慰說，奈良美智畫風都好另類，一樣紅得起，而且隱居深山過恬靜生活，代理拿她的邪惡女孩出產品，奈良卻在訪問中表示「不喜歡，但沒辦法。」說到這裏，他笑了：「日本Market大，做另類紅咗塊餅已經好大。到我咁紅時，我都會笑住講話不喜歡，但控制唔到！」
記者：何兆彬
攝影：伍慶泉