女仔，有邊個唔想美貌與智慧並重？有邊個未發過做港姐夢？今日《同車蜜語》請嚟嘅陸詩韻（Sharon），獲選05年香港小姐亞軍，美貌、智慧絕對公認，Sharon夢想成真，近排做埋《東張西望》嘅主持，人氣急升。
Sharon揸住架有型BenzC200到達，同行嘅攝影師露出羨慕眼光，點知Sharon話：「最初我亦有嫌棄過Benz，認為係老餅揸，點知揸落感覺好有型，原來Benz都可以Young，完全改觀！」
文：許一楓
攝影：何家亮
大方得體的港姐
今日訪問勁開心，和暖的下午約咗靚女港姐Sharon遊車河！螢幕上，表現高貴斯文；公開場合，打扮例必長裙，點知正式見面時，完全另一種裝束示人。踏正2點，Sharon準時到達，下車只見她緊身上衣襯短裙，再加對黑色長Boot，原來車手Look竟然可以咁迷人！
為了靚靚學揸車
坐住Sharon架車，見佢揸車小心翼翼，瞻前顧後，正讚佢揸車斯文之際，誰知佢回應一句：「想當年18歲時，我好好勝㗎，唔理屋企人反對，攞成人身份證第2日就趕去考車牌，仲係棍波喎，一心諗住用最快時間攞咗個牌先！」以為佢恨揸車，原來一切都係為咗要有型，「好少女仔會咁快考車牌，我就係要做啲一般女仔少做嘅嘢，原因？型囉！」呢位港姐都幾有時下𡃁妹嘅反叛出位味道喎！
可能年少嘅關係，18歲嘅考牌夢，最終都係破碎收場，「或者當時太細個啩，咩經驗都冇，加上又考棍波，心情緊張，最後咪衰咗囉。」原本諗住屢敗屢戰，立即報考第二次，點知屋企人強烈反對，喺缺乏家人金錢支持下，最終都無得再考。
買車都要型到底
「成為港姐之後，佢哋覺得我入咗呢行搭的士唔方便，反而鼓勵我考牌。」Sharon講求實際考自動波，在未正式考到車牌前，Sharon已急不及待同Daddy揀定車，仲買埋心水車牌號碼，信心十足。
講到買車，亦都離唔開Sharon口中嘅型字：「當時我好想買Honda部Jazz，咩色都好，最緊要有型，點知Daddy反對，佢話買車一定要穩陣實淨，必選Benz；但係當時我覺得Benz好老套，一啲都唔Young，最後佢畀錢，當然佢話事啦！」雖然對架Benz第一印象麻麻，點知揸落就漸漸有感情：「𠵱家揸落覺得佢好啱我，唔會太大架，2,000c.c.夠晒我用，外形大方得體，有啲流線外形，帶點跑味，一啲都唔老套！」
一年牌仔四處遊
短短一年牌仔，Sharon數數手指，原來已經揸住呢架車遊遍香港唔同景點，「你講得出嘅景點我都差唔多去過晒，大尾篤、赤柱、元朗B仔涼粉、大埔許願樹等，我都識去！」
回想攞牌一星期後，首次遇到有驚無險嘅交通問題，「嗰晚喺灣仔，我只顧住睇地標而分咗心，原本應該靠左轉左線，點知我由中線直接轉左，仲要開得快過人，最後俾個行慢線嘅巴士司機手指指鬧我！」自此之後，Sharon就唔敢再咁鹵莽大意。
少有Benz揭背跑車
BenzC-Class一直只有4門房車版，但在01年廠方為車系新增一款名為SportsCoupe的雙門跑車；雖然車首跟傳統4門版相同，但車尾造型則是全新設計，而雙天窗設計更是賣點所在。引擎是台2.0公升引擎，在Kompressor機械增壓系統輔助下，馬力跟扭力輸出算是不錯，而跑車化的底盤結構，也正好凸顯出它的跑車個性。
Mercedes-BenzC200KompressorSportsCoupe規格
引擎：1,998c.c.直4DOHC配Kompressor
馬力：163hp/5,300rpm
扭力：23.5kgm/2,500-4,800rpm
傳動：5前速半自動波
當年車價：$388,000
現時二手價：約$280,000起