阿仙奴已經可以專心備戰07/08球季，因為聯賽盃、足總盃先後失利，下周中歐聯大戰，要奪冠談何容易！
雲格有可能面對四大皆空嘅現實，馬後炮咁講，只怪足總盃主場對布力般用錯戰略，機關算盡而又算不盡；歐聯落後燕豪芬，足總盃放虎歸山，讓布力般可以返主場迎戰自己，係人都知足總盃打嘅係一鼓作氣，雲格將自己陷入險境，唔出事就奇！
今晚面對雷丁，上面講過，阿仙奴下周要打歐聯，必定留力對燕豪芬，聯賽漫漫長路，只要保住歐聯資格已經ok，如無意外，大部份主力將會收起。另外，如果出場名單繼續有辛德路斯，兵工廠將會中門大開，對住雷丁嘅傳統英式踢法，高波、頭槌輸硬！呢場波可惜無「讓球」玩，我只有博少少，試雷丁「客勝」。
除咗雷丁之外，大家不防多啲留意英超榜未形勢，我會繼續追韋根贏波，上場贏紐卡素之後，今晚對住已經3連敗兼實力一般嘅曼城，我相信有力開客勝！
周鵬
商業1台《球迷集中贏》主持
電郵：[email protected]