大埔太和有條「中西街」？就算老街坊都未必聽過，事關佢係一條新興嘅食街！講緊係舊墟附近嘅美新里。呢度有中、西食店混雜其中，最醒神嘅係可以篤住波飲酒、食歐陸甜品，好有歐陸小酒館情懷。此外，亦有中式嘅罕見鮮豬雜、客家鹹雞等呢類老派圍頭菜，仲好傳統、好有火候，短短百尺小街，中西互溝，去呢度搵食，必定搵到你杯茶。
記者：朱崇德
攝影：何家亮、譚盈傑、朱崇德
Model：Isabell
西式店
1.After5篤波歐陸小酒館
舖名After5！嚟飲茶乎？啱咗一半，飲嘅係鬼老涼茶！
一入門見十多呎高樓底、2,000呎樓面，路邊開放式門口設計，感覺愜意舒適；不過醉翁之意又豈止在酒？粗略評估全店7、8成都係OL客，老闆娘Amina解畫：「呢度唔准玩骰盅猜枚，嚟嘅都係斯文客，所以附近早出晚歸嘅OL特別喜歡喺度聚腳談心！」
另一令我流連忘返嘅賣點，係店尾竟有張美式桌球枱，唔收錢任玩，嗰種Hea住飲嘅感覺，真係好「鬼」鄉郊小酒館情調，所以呢度都主攻歐陸風味小食，據知大廚阿Ken，係瑞士學師回流香港嘅大廚，最拿手做原汁原味歐陸小食。
炸芝士條$52
將Mozzarella芝士刨碎再搓成芝士條，裹以蛋漿、麵粉、麵包糠炸香成魚手指狀；嫌芝士味寡？中間的法式蒜味汁、紅辣粉及法國芥辣混出一片鮮辣，最別致是加入大量生蒜，令人有種忍着淚都要一吃的感覺；伴碟還有青芹、紅蘿蔔點醬食。
焗芝士伴帕爾馬火腿配法包$78
烤得軟而微焦的芝士流入鹹鮮的帕爾馬火腿，香軟煙韌，吃到底是一片欖香蒜茸法包，猶如將歐陸小酒館風味吃在口中。而伴碟的紅酒汁是將一支紅酒煮成得3，微酸加葡萄香，酒肉香味更濃。
ChampagneMarche$60
OL們的調酒至愛－香檳配蜜瓜酒，甜甜的蜜瓜味令人有種幸福感覺，香檳又有種喜慶的快樂感；不過甜甜果味易入口，小心飲醉。
After5（26633551）
地址：大埔美新里5號美菱居地下A舖
2.甜豆屋半島級創新甜品
郊區小甜品店，睇唔上眼？咁就大錯特錯！門口貼滿各傳媒剪報介紹，點解走咁遠都要食佢個甜品？因為主理嘅行政總廚葉生，原來以前是半島酒店甜品師，有30多年經驗，這裏的梳乎厘、心太軟等只是小菜一碟，好多創意甜品新食，只在此間搵到，出到去連酒店都冇得食！
意大利格沙打$281客2件
格沙打係意大利做雪糕最出名的地方，此甜品是將芋頭、士多啤梨及朱古力雪糕做成三夾層，再放入以Rum酒、開心果、棉花糖打成的淡忌廉，香甜美味。
朱古力脆香千層酥$34
鮮焗的千層酥皮，夾着的是吉士醬、朱古力及鮮忌廉，特別處是將傳統的士多啤梨改以香蕉片替代，軟軟的香蕉片配以脆脆的酥皮，變化感覺更強烈。
芝軟心$32
心太軟嘅芝士版，完全冇朱古力！芝士海綿蛋糕包裹着的是酸忌廉配吉士打（類似燉蛋）及焦糖，一切開就有如山洪般傾瀉而出，入口芝味微焦香濃，質感軟軟滑滑，筆者評價是比心太軟更好食！
甜豆屋（26669380）
地址：大埔美新里5號美菱居地下D舖
中式店
3.為食雞客家鄉村風味
店名為食雞，感覺幾搞鬼，不過呢度嘅餐食完全唔講得笑，罕見嘅客家鹹雞，純香港鄉村風味，呢度可以食得到！就算加埋鮑魚片，都係30零蚊一個，絕對有特色又抵食。
客家鹹雞鮑魚套餐$32
客家鹹雞同鹽焗雞的最大分別，是鹹雞有鹹香味之餘，仍保留嫩滑口感，加上用黃油靚雞，油份唔高有雞味。
豉汁蒸䱽魚$48
䱽魚面塗豆豉茸、椒絲及葱粒，好味之處在於混醬將魚身全包着，令肉身不直接受火，以保肉質嫩滑。
為食雞小炒王（26616368）
地址：大埔舊墟美新里地下1號A舖
4.生滾粥足料又夠綿
生滾粥同走地雞一樣，都有種久違了的感覺，不過喺度就可以食到！艇仔、碎牛平時嘅粥館大概都食到淡晒口吧，如果好似鮮豬雜同鮮打鯪魚球粥，或者呢碗粥可以再引起你的食慾。呢度仲有近年少見的包伙食服務，送學校時又送工廠，小小一間粥館，真係估佢唔到！
白灼鮮豬雜$38
近年真係好少粥館做此菜，據知是特選以新鮮豬仔腰、膶、腸、肝所做，加上火候剛剛好更添其美味；淋面的醬油做得微甜，入口惹味脆爽。
鯪魚球粥$12
睇店名就知係招牌菜，每日取新鮮鯪魚肉，完全唔溝粉鮮打成爽滑彈牙鯪魚球；球中混雜的果皮更是陳年貨色，更添其香，粥底綿又滑，點點生菜作點綴，好有HomeFeel的清新口感。
魚滑粥粉麵茶餐廳（26674719）
地址：大埔翠樂街8號富萊花園8號地下
（包伙食）真抵食美食速遞（26630038）
