前晚花旗股市玩過山車，開市急挫200點，尾市曾倒升20點，收市跌34點，不過亞洲股市普遍繼續跌，港股好威，升95點收市，不過，呢啲都係表面嘅，恒指變化只代表幾十隻成份股嘅綜合變化，反映唔到其他股份嘅表現，所以，單係睇恒指，好多時都會誤導咗自己。
昨日上升嘅正股得173隻，近排如果個市升，應該有500幾隻股票升，呢個咁細嘅數字，肯定反映一啲嘢，睇埋下跌股份數目，大家就會明白晒，係765隻，下跌股份比上升股票多成600隻，個市係點，應該已經好清楚，再睇埋啲跌幅，就更嚇大家一跳，下跌10%收市，已經係濕濕碎，睇埋過去一個禮拜嘅圖，真係Noeyesee，實情係血流成河，二三線股跌得最傷，但係藍籌同中資股都跌得好慘，下禮拜一個市會點，就要睇住隻滙控（005），收市宣布業績，大戶唔一定係禮拜二先做嘢，況且𠵱家係環球股市下跌，逢反彈都會有沽壓。至於二三線股，好多股民應該仲成手「蟹貨」未沽，下個禮拜初應該仲會有大插場面。
寫咗咁耐窩輪，好少介紹P輪，因為正常嘅市況日日都可以搵到C輪推介，但係喺大跌市，推介一啲只升1日嘅C輪冇乜用，俊樺睇個市幾淡，所以近日清一色介紹P輪，𠵱家仲好相信恒指今個月會下試18000-18500。
港交所P輪7924：港交所（388）昨收76.10元，最低見過74.65元，10日線跌穿50日線現「死亡交叉」，出面啲ELN多咗好多，個價就越推越低，可以吼位買港交所P輪7924，昨收86仙，槓桿率8.9倍（有效3.7倍），正股跌穿74元會下試66元，到時7924會有6成升幅，正股升破81元止蝕。