以前本欄曾提及台北故宮博物館全新裝修後，在一二月展出北京精品，一啲朋友特別飛去台北參觀，回來後無不讚好！教授W去得遲啲，上星期先至去，啱啱錯過一啲精品展，有啲失望，教授W話：「最靚嗰批已經收回，冇一早撲過去，走寶咯。」冇法子啦，左丁山到𠵱家都未搵到時間去，更加失望。一位讀者Rose來函話佢嘅父母已經七十幾歲，想話參加旅行團去台北故宮博物館。左丁山唔識得乜嘢特別旅行團，故此唔可以介紹，照計飛去台北好易話為啫，例如搵航空公司嘅「機票加酒店加本地遊旅遊套餐」，就可以輕鬆遊台北嘞。至於故宮展覽資料，上網一查台北故宮博物館網站便知。
今日星期日係渣打馬拉松舉行嘅日子，去年渣打馬拉松碰上惡劣空氣污染，一位中年參加者不適送院，不幸逝世，當時未開跑前披圖梁曾私底下發出健康警告，今年又如何呢？披圖梁對去年有人跑馬拉松而死亡，心有不安，至今仍然記住。今年披圖心為之危，居然喺二月二十四日寫信去畀國家領導人吳儀副總理，請吳女士注視三月四日渣打馬拉松，可否指示珠三角一帶有排放污染物的工廠暫時停工兩三天，等香港啲空氣污染有改善喎。知道披圖有此意見後，左丁山特別注意到年初九（二月二十六日）珠三角開工後，香港嘅空氣污染狀況，過去五日，本港空氣污染屬中等水平，唔算太差，但開足工之後，相信污染又會回復偏高水平。
披圖致吳儀信件講到：「運動員把二氧化碳、二氧化氮和臭氧等吸進體內，容易缺氧而抽筋，產生痙攣甚至不幸死亡……」正是英雄所見略同，香港大學醫學院社會醫學系講座教授AnthonyHedley喺二月二十八日對《南華早報》記者講，任何人參加三月四日之渣打馬拉松，健康後果自負，Hedley教授話有人問佢意見，佢只能講：「如果係我，就會缺席！」佢認為污染空氣對心臟、肺、血管甚為有害，對長跑運動員點會冇影響？希望今日唔好太熱，污染唔好太高啦，冇人想好事變壞嘅啫。