要數近年拍得出色嘅魔幻片，非墨西哥導演吉拿域戴拖路（GuillermodelToro）執導嘅《魔間迷宮》（Pan'sLabyrinth）莫屬，呢套片掃完好多國際大獎後，又剛喺奧斯卡攞埋最佳攝影、最佳美術指導及最佳化妝獎，相當唔簡單。 撰文：戶川淳
先講本月15日正式喺本地上映嘅《魔間迷宮》有幾威水，呢套由墨西哥同西班牙兩國合資拍攝嘅魔幻片，首先喺今年初舉行嘅西班牙影壇最高榮譽哥雅（Goya）獎中一口氣獲得最佳影片、最佳導演、最佳編劇、最佳男主角沙治洛庇薩（SergiLopez）、最佳女主角瑪莉貝維度（MaribelVerdu）等等13項提名，同時亦獲得美國電影圈嘅高度評價，不但入圍金球獎最佳外語片提名，同時獲得波士頓、佛羅里達影評人協會評選為年度最佳外語片同最佳攝影，更喺美國影評人協會（NationalSocietyofFilmCritics）擊敗《無間道風雲》（TheDeparted）同《巴別塔》（Babel）勇奪年度最佳電影大獎，剛剛喺奧斯卡又掃埋最佳攝影、最佳美術指導同最佳化妝三項殊榮。
逃避內戰現實
套戲咁猛料，個故事都唔簡單㗎，導演將1944年西班牙處於內戰時期、國家受到法西斯獨裁者高壓統治所籠罩嘅背景融合魔幻故事。故事講小女孩奧菲莉雅同母親被迫同繼父一起生活，眼見擔任軍官嘅繼父為政府執行暴行，小小心靈感到無奈，奧菲莉雅開始逃避現實，活喺自己心中嘅奇幻世界。
有一日奧菲莉雅無意中誤闖巨石迷宮，遇見羊頭人身嘅農牧神，發現原來自己係傳說中嘅地下王國公主，為了重返家園，佢必須完成三項艱巨嘅任務，不過奉勸大家入場時要作心理準備，小心被過癮得嚟又核突嘅怪人同震撼嘅暴力場面嚇親！
其實套片唔止拍得有風格，個古仔融合咗奇幻、驚慄、寓言三種唔同元素，亦集綺麗、恐怖同緊湊於一身，成功將殘酷嘅現實同夢境混合喺每格菲林之內。