大家都話西貢係「香港後花園」，我總覺得真正嘅後花園係大澳嘅「悟園」。西貢交通越來越方便，無咗尋幽探秘嗰種神秘感。但對於一般市區居民嚟講，大澳總係有山長水遠嘅感覺，入到大澳再行吓引水道上吓山路，去到初春花團錦簇嘅悟園，嗰度雖然係人去樓空，帶點殘破嘅亭台樓閣，卻令遍園嘅鮮花更搶眼，心情自然豁然開朗！
記者︰劉昱蘭
攝影︰伍慶泉
Model︰Vanessa、Koey（IG綜藝社群）
未到先聞花香
同朋友講我去悟園，佢同我計︰快則半小時東涌入羌山，再飛咁行都要半個鐘登上悟園，就算走馬看花，一來一回都要成差唔多3個鐘先入到呢個「爛鬼花園」，值得咩？Sorry，值喎，在山路離遠望去悟園，已經見到點紅點綠，即刻加快腳步行入去，花都未睇真就先聞到陣陣花香，呢個時候開得最靚嘅係杜鵑，但陣味唔係佢！追蹤住啲花開，原來係有點點白花嘅桂花樹令滿園飄香。往上走還意外地見到有人用朵朵茶花，拼成一個微笑嘅茶花女。悟園係有請人打理嘅，唔係啲花點會咁密集開得咁靚喎。
信佛商人私人花園
悟園個名帶點佛家味道，因為佢以前係一個篤信佛教嘅有錢商人私人園林勝景，喺未開發嘅大澳闢一片靜土畀自己禪修，起亭台築樓閣，還建園搭橋種花，如果我有能力咁樣隱吓世都幾過癮。佢過咗身以後，家人開放悟園畀公眾遊覽，周末周日會熱鬧啲，仲會有人賣汽水。朋友唔鍾意行咁耐睇花園，我就話遊吓車河再舒舒服服咁行吓山已經好開心，行完仲有花睇喎，點會唔值呀？
悟園點樣去？
在東涌地鐵站，轉乘11號往大澳巴士，約40分鐘車程後，在「羌山龍仔」站下車，進入「羌山（南）引水道」。沿引水道石屎路一直行，約30分鐘便會見到「龍仔萬丈布」路牌。
東涌炮台睇古蹟
行完悟園搭番巴士出東涌，咁遠水路嚟到，不如出到市區前先到東涌炮台站落車，參觀多個古蹟先走人。東涌炮台係張保仔起嘅，亦在清朝時被修建，其後英國租借咗新界離島就廢棄咗，𠵱家政府加咗展館、穩固城牆後，列做法定古蹟，係香港唯一保留炮台嘅堡壘。
試地道印度餐
行咗咁多路要快快醫肚，出炮台左轉行3分鐘左右，有間正宗印度餐館，老闆阿Gill係印度人，但好照顧港人口味，辣度可以任你選擇，佢知我唔食太辣但鍾意嗰陣香味，即時調啱我胃口。
咖喱魷魚 $48
食印度嘢點可以唔食咖喱？印式咖喱加咗乳酪會惹味啲。
印式燒芝士 $55
餐廳自己喺印度入特色芝士，比西方芝士硬一啲，咬落似帶少少奶味的辣豆腐咁，好新奇。
$16/塊
什果薄餅好得意，有果仁嘅咬口，仲有車厘子嘅香甜，口味獨特。蒜茸薄餅香口到停唔到口。
甘地印度餐廳
地址︰東涌下嶺皮村8號
電話︰29888674
