溫拿前晚在紅館演出尾場演唱會，不少名人均有捧場，五虎表示跳舞跳上癮，健仔更揶揄要到舞廳繼續跳，阿B則謂想學跳老舞，阿倫即舉手支持，又指跳老舞可收腹兼壯陽，還會叫新婚的李克勤跳，阿B聞言開心地說：「得閒冇事都要跳吓。」看來一班男人都樂於「增值自己」。
溫拿在紅館舉行一連13場的《溫拿33好時光演唱會》前晚圓滿結束，台下群星拱照，除五虎家人外，還有陳欣健、狄波拉、陳百祥與黃杏秀、鄺美雲、華娃、陳慧嫻與男友、鄧小艾與兒子、殼王陳國強與太太等。黃杏秀、八姑娘及鄺美雲更大派利是，認真畀面。
勁舞自組「F5」
五虎眼見群星如雲，即以純熟舞技及爆肚笑話回饋支持，譚詠麟（阿倫）笑指樂隊名字叫F5，他叫「仍然郁」，陳友是「唔識郁」，彭健新是「周身郁」，葉智強叫「唔郁」，最後指着鍾鎮濤（阿B）說：「佢姓鍾，叫中間郁。」惹得全場大笑。
五虎在慶功宴上表示跳舞跳上癮，阿強說：「我開頭覺得跳舞好悶，𠵱家好想繼續跳，想聽晚都有得跳。」健仔即取笑他說：「你聽晚自己去舞廳跳啦。」葛民輝聞言也揶揄說：「軟硬跳舞都夠嚇死人，好彩有溫拿墊住，佢哋真係技驚四座呀！」
下次輪椅大賽
阿B謂現在很想學跳老舞，阿倫說：「你跳老舞好睇喎，你嘅身形跳華爾滋一流，我聽跳老舞啲人講，跳舞收腹，可以壯陽㗎。」阿B聞言笑說：「咁我得閒冇事跳吓先。」阿倫即說：「叫李克勤跳多啲啦。」
此外，阿B在台上再提及破產事件時說：「之前有幾晚講到忍唔住喊，但都係開心嘅眼淚......人越大越覺得朋友可貴，𠵱家知道邊啲係真朋友。」後來阿B謂溫拿演唱會本來五年一次，結果因他而要延遲至33周年才舉行，又說：「不過唔緊要，三三不盡，六六無窮，唔知我哋66周年要表演啲乜呢？」阿倫笑說：「輪椅大賽啦。」
採訪：李珮洳 攝影：陳慧安
