港股雖然喺上個禮拜五出現咗個小型反彈，但並唔全面，好多股都無份，好似舊年底升到癲嘅五行，繼續係咁跌，正一電影《無間道》金句：「出得嚟行，預咗要還」。喺《Yahoo討論區》內，就有班唔係好想「還」嘅五行散戶，開咗個「五行俱樂部」吹水。
唔見咗部大電視
一名自稱HK2打6嘅股民話：「賬面上賺少十幾萬，夠買一部大電視，再加一套靚靚真皮梳化，但我今日心情怪怪哋，有少少悶氣但仍十分高興。」中港歐美日咁樣跌法，呢位仁兄都只係賬面上賺少十幾萬，即係未蝕錢，當然「仍十分高興」啦！
網友大個仔就無咁好彩，「再係咁跌落去，就唔係幾乎冇利潤咁簡單，係要入肉喇！唔知今個禮拜會點樣呢？不過點都好，我都唔會放。」另一位網友becky80224重堅，「估唔到交行（3328）仲有得跌，如見6.50元，必買放入床下底等退休！」
大行又點睇呢？摩根大通出咗個報告話，其實今次呢個中港歐美日大跌市，只係調整，唔係到頂。啲銀行股一齊陪跌，亦都只係投資者套利。摩通相信，短期而言全球大市繼續波動實在難免，暫時亦未係買內地金融股嘅時候。
摩通：等執平貨
點解？摩通話，雖然佢哋覺得上個禮拜嘅調整、特別係內地股市，有啲跌過龍，內地銀行股同埋壽險股嘅秀麗前景亦無改變，但內地緊縮貸款增長嘅政策方向一日未變，內地金融股盈利增長放慢嘅隱憂一日都唔會消除，咁即係遲啲仲會再跌。
摩通重話，大家一定要記住，如果一個國家嘅貨幣價值偏低，同埋面對將貨幣升值嘅壓力，咁個國家一定會出現通脹，但係如果國家死㩒低通脹，資產價值上升係唯一結果。幾年前，中國地產嘅泡沫就係咁吹出嚟，𠵱家就同樣反映喺股市度。摩通再加多句，叫大家再畀啲耐性，遲啲就有平貨買。