豬年開始無耐，唔少人都趁呢個時候睇下流年運程。曼城領隊皮亞斯，今周末就會喺英超主場「擺檔」，以勝仗向客軍韋根領隊狠批，佢哋今季想留級都難！曼城W可捧之外，作客富咸嘅阿士東維拉，亦可考慮作冷選材。華度
皮亞斯係咪真係識睇相？真係要問佢本人至知嘞。不過，呢位球員時代出名係「鐵漢」嘅領隊，都有啲迷信嘢，每次領軍出賽都會將個女送畀佢嗰隻公仔，擺喺場邊當做「吉祥物」，話唔定真係識得我哋嘅風水術數噃。
今周英超，曼城就會喺皮亞斯帶領下迎戰韋根。兩軍目前同處聯賽榜護級邊緣嘅下游位置，今仗都可謂搶分戰。形勢上曼城多韋根1分，仲少打韋根兩場；加上曼城上周聯賽輪空，足足有兩周時間休息，今日仲要唔使周圍走，留守主場，的確有利。
韋根上周聯賽主場1:0擊敗紐卡素，但呢個勝果未必能反映到球隊狀態。呢支上季升班後，踢過一陣子好波嘅球隊，今季整體表現唔達標，最近13場就輸足10場；計作客賽事，近6場作客波錄得1和5負，可見離開主場就認真惡搞。
更大問題係球隊正選門將卻克蘭，以及主力中堅廸蘇禾仍然因傷缺陣，另一中堅賀爾就喺前仗領紅牌，要去到月中至能夠復出。喺呢個搶分護級關鍵時候，領隊祖維爾無咗幾件防守主力作調動，都咪話唔頭痕。
維拉作客有望爆冷
反之曼城經過1月轉會期增兵，加上有兩個禮拜讓一眾有微傷在身球員回復，現時兵源充足，今季主場亦有擊敗過阿仙奴及愛華頓前科，是役讓波唔多，單W都有逾兩倍回報，的確值得捧場，將韋根踢落去更水深火熱嘅位置。
至於今周有啲分頭選擇，可以試下同曼城一樣，喺上周聯賽輪空嘅阿士東維拉。維拉今輪作客富咸，睇富咸近3仗連敗，正處頹勢，維拉經過幾周休養生息，是役未必無機開個3倍冷W！
投資特攻隊金句
「喺呢個搶分護級關鍵時候，領隊祖維爾無咗幾件防守主力作調動，都咪話唔頭痕。」