對於流動通訊業界嚟講，噚日真係有喜又有悲！先報喜，數碼通派中期成績表，爭到頭崩額裂，都仲賺緊四千幾萬，CEO黎大鈞真係功不可沒。另外，CSL搞春茗，根據CEO伍清華滙報嘅各個經營數據，就好似佢哋個尊貴品牌1010咁穩打穩紮！
悲嘅就係，俾李二少私有化咗嘅SUNDAY宣布，呢個月開始用電訊盈科流動品牌，又一個經典港產品牌壽終正寢。
SUNDAY係由香港電訊教父衛斯民為首嘅一班電訊佬搞出嚟，1997年9月開台，開頭真係好巴閉，尤其係一系列出位廣告（例如的士女鬼、眼球麵），被投訴之多，非船頭尺啲粗口能及，亦都因為in成咁，好快就成為年輕一族至愛嘅流動網絡！後來2000年科網熱上市，個勢仲keep到，之後傳過幾個人想買起佢，其中一個係超人嫂，但最後響05年6月俾二少買起，舊年12月除牌，至於話個brand，嗰陣二少頭馬艾維朗已講明兩個只能活一個……
官府大計 層出不窮
SUNDAY嘅命運唔使多講，但其實睇睇其他網絡商，大家都生意難做，好似官府失驚無神話整第五個3G牌，一陣又話預算案豪兩億幾搞全城WiFi，真係幾難觸摸，講開呢個全城WiFi大計，數記黎總話，完全唔知政府想點，可能係抄新加坡啩，一句講晒浪費納稅人錢……如果噚日佢唔係趕住開會，應該響會展六樓踩落Ballroom參加特首辯論大會，問吓煲呔個政綱係咪官與民鬥！
[email protected]